Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die Hertoghe Ian van Borgoengien verradelick vermoort wart van des Dolphijns volcke.

KAerle die dolphijn van Vyenne sconincx Karels sone van Vranckerijcke, ende Ian die Hertoghe van Borgoengien graue van Vlaendren vergaderden in Vranckerijcke te Montreu vp dye cheyne om te tracterene hoemen die Inghelschen huyter croone van Vranckerijcke soude moghen verdrijuen. Maer si die den Dolphijn hadden te regierene, dye sloughen den Hertoghe Ian verradelic doot in die presencie vanden Dolphijn, ende wierpen hem gheleerst ende ghespoort in eenen gracht in dye maent van Septembre den thienden dach. Tincarnacioen van dien staet in dit veers. Impie dolphine cur occubuit leo per te. Noch een ander Incarnacioen. Fit leo mactatus fictiua pace ligatus.

[Anno.M.CCCC.ende xix.int selue iaer, ende ooc tsiaers te voren]

¶ Anno.M.CCCC.ende xix.int selue iaer, ende ooc tsiaers te voren doe quamen brantstichters huyt Inghelant, die ter bede ende ten versoucke vanden hertoghe van Orliens huerden lieden in Vlaendren omme dat vier te stekene in diueerschen plaetsen van Vlaendren. Ende midts dat die Hertoghe van Orliens daer gheuanghen lach te Lonnen, so wilde hy hem aldus wreken vp den hertoghe van Borgoengien. Ende sy staken tvier in Poperinge, in Weruijcke, in Dixmude, in Eeclo, in Oudenburch, in Brugghe, in Roesselare, ende in meer andere plaetsen, ende si maeckten meneghen armen mensche bi dien brande. Daer worden vele vanden voorseyde brantstichters gheuanghen, ende si waren al naect vp eenen waghene ghebonden, ende vp haerlieder lijf ghestreken met gloeyende ysers, ende daer theynden onthooft, ende ghestelt vp wielen, ende eenen vierpot daer aen ghehanghen.

[Int selue iaer van.xiiij^c.ende xix]

¶ Item int selue iaer van.xiiij^c.ende xix.in die stadt van Bruessele quam een grote menichte van Rudders, ende van knechten van oorloghen, omme dat commyn vander stede te nyeuten te doene. Ende dat ghemeen te wardes gheware, ende si sloughen een deel vanden edelen doot, ende vinghen bet dan.xxx.edelen, die heere van Heynsberge, heer Eueraert boot, ende meer andere, van den welcken mer Eueraet boot sijn achtienstere was onthooft, maer dye heere van Heynsberghe ontghinckt schalckelick.