Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
[Folio lxxiij.v]
| |
ITem int selue iaer vp den.xxvij.dach in Septembre, was ghesien een wonderlijcke planete in die lucht vlieghende van diueersche varwen, ghelu, root, groen, ende swart.
¶ ITem te wijle dat die coninc voor Ghendt lach, die van Ghendt quamen dicwils huyte omme te schermutsene, ende somwijlen so bleuen sy doot, ende somtijt slougen si ooc hare vianden, Ende binnen deser tijt die coninc van Vranckerijcke ende die graue phelips van vlaendren sonden heymelicke brieuen aen eeneghe binnen Ghendt, maer sommeghe andere sloughent omme. Ende die coninc vernam dat die stede ghenouch gheuitaelgiert was voor een half iaer, ende so langhe en stont hem niet aen daer te blijuene, ende hy liet die steden ende casteelen wel ghemant ende besedt, omme tander iaer weder te commene. Ende als hi ontrent.xiiij.daghen gheleghen hadde voor Ghendt, so brac hi vp, ende voer naer vranckerijcke. Ende die coninc liet sine brieuen te Ghendt vanden vrede, als behouden lijf ende goet sonder arghelist, omme te besiene of si hem bedencken souden, want die graue Lodewijc vergaft hem lieden in sijne doot, ende hi badter voren sinen sone den hertoghe van Borgoengien, ende sijnder gheselnede. Dit was ontrent sinte Maertins messe. Int iaer.xiijc.ende.lxxxv. Ende dese voorseyde brieuen waren in Ghendt onder sommeghe, maer men dorstes niet openbaren, want dye sommighe waren metten coninc van Vranckerijcke, ende sommeghe andere waren metten coninc van Inghelant. Ende dye coninc kaerle ende Phelips die hertoghe van Borgoengien, ende die hertoghinne, graefnede van Vlaendren, si belasten eenen rudder daer mede, om dat haer lieder brieuen te Ghendt voor tcommuyn gelesen souden worden, ende die hiet Ian van Heyle. Ende hi seynde aen hem een sheren knape van ghendt, dat hi yeghen hem soude commen spreken, ende hi hiet Iacob van Eerdtbuer. Maer die knape ghinck tot meester Martin vander galeyde, ende hi riet dat si souden gaen totten Rewaert. Ende byden Rewaert commende, hi consenteirde dat die knape ghinck tot den Ruddere. Ende die Ruddere sandt den knape weder totten Rewaert, ende vraechde hem of hi hem wilde bescriuen ende beseghelen Nyneue ende Roesselare, ende duysent francken ghewichtich van goude, hy soude hem daer voren eens maken die.iij.steden van Vlaendren, ende voort al tghemeene landt. Die meester Martin vander galeyde, ende Pieter van adijnghen ghinghen met den knape voor den Rewaert, ende spraken so metten Rewaert in secrete onder hem lieden, soe dat hy den Rudder consenteirde al sine begheerte, in dien dat hi sine belofte vuldade. Ende swoeren te gadere die Ruddere ende dye Rewaert vander stede van Ghendt, ende meester Martin vander galeyde, ende Pieter van adijnghen, dat sijt in secrete houden souden, tghene dat sy onder handen hadden. Ende si belasten eenen priester, ende dye Rewaert gaf hem eenen brief van saufconduyt eenen termijn gheduerende weder binnen der stede te sine, omme te treckene byden ruddere. Ende dese ruddere midts den priester reysden naer Oudenaerde, ende van daer naer Rijssele, ende van daer te Parijs. Ende desen voornoemden ruddere liet den priestere in sijne herberghe. Ende hi track byden coninck ende byden hertoghe van Borgoengien, ende hi gaf al daer sijne saken te kennene. Ende die priester was ghehaelt in des conincx hof daer in dat hi seere beschaemt was. Ende byden coninck van Vranckerijcke waren als doe grote personaegien, als den machteghen coninc van Hongheryen, ende menich ander edel baroen. Ende die coninck van Vranckerijcke ende die Hertoghe Phelips siende die diligentie van desen Ruddere, ende hoorende den sin vanden Rewaert vander stede van Ghendt ende van sinen medepleghers, sy screuen brieuen ende beseghelden daer inne, daer by dat si wilden blijuen. Die Rudder metten priester beloefden daer dat si souden doen soe vele dat dye brieuen souden ghelesen worden voor tcommuyn vander stede van Ghendt. Ende dye brieuen ghelesen sijnde, dat was naer den dach van Sinte Symoen ende Sinte Iude, Iacob van Eerdtbuer dye Rewaert van ghendt dede tvolck vergaderen in dye wapene met dye van der wet, ende met meester Maertin van | |
[Folio lxxiiij.r]
| |
der galeyde voornoemt. Des hilden den vrede ghewapender hant, ofter yement aldaer den paeys hadde willen beletten. Daer waren lieden ghecoren om Toudenaerde te treckene, omme saufconduyt metten voorseyde priestere, ende meester Maertin voer mede. Ende sy brochten van daer een saufconduyt vanden edelen vanden rade, die als doe Toudenaerde laghen, twelck gheduerde totten nyeuwen iare. Ende daer was eenen dach gheleyt te Doornicke, daer alle die steden van Vlaendren vergaderen souden, inder welcker men tracteren soude van paeyse. Ende dit was sdaechs naer sinte Andries dach, ende in dese selue tijt vp sinte Kathelijnen dach ontboden die van Ghendt bi hem lieden, om rekeninghe ende bewijs te doene. Ende hi brochte brieuen van Inghelant maer si en wildender niet naer horen, maer emmere sy accordeirden metten Rewaert, ende met sijnder rekeninghe. Ende als Pieter vanden bussche vernam dat dye dachuaert ouer gaen soude, hi vloot huyter stede van ghendt, want hi hadde een vanden vpsetters gheweest. Ende dye van Ghendt sonden haer ghedeputeirde te Doornicke ter voorseyde dachuaert. |
|