Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Phelips le Hardy, des Conincx Ians sone van Vranckerijcke, dye xxvij.Graue van Vlaendren.

Dat.xxxiij.capittel.

PHelips le hardy des Conincx Ians sone van Vranckerijcke, van sijns wijfs weghe des grauen Lodewijcx dochtere Margriete, die hi ghetraut hadde, wort graue van Vlaendren, van Artoys, van Bourgoengien, van Retheers, van Nyueers, here van Salines, Pallatijn, here van Mechelen, ende van Antwerpen, ende verbeydere van Brabant, inder manieren hier naer volgende. etc. Phelips le hardy des Conincx Ians sone van Vranckerijcke, Hertoghe van Borgoengien, Graue van Vlaendren. etc. Ende wi Margriete Hertoghinne ende Graefnede, vrauwe vanden landen ende steden voornoemt, huyte dyen dat naer dye doot van onsen gheduchten here ende vadere Lodewijck Graue van Vlaendren, wiens siele god ghedencke, Tgraefschap van Vlaendren metten anderen landen ende heerlicheden daer tot behorende, toecommen ende verschenen sijn ons Phelips voorseyde by causen van onser voorseyde hertoghinne onse gheselnede. Ende ons Margriete voornoemt als dochtere ende erfachtich hoir van onsen voorseyde heere. Ende wy vp den dach van hedent, als vp den.xxvi.dach van deser yeghenwoordegher maent van April commen sijn in onse eyghenwoordeghe stede van Brugghe, waer in dat onse poorters ende dye ghemeene subgijten van onser voorseyde stede van Brugghe ons den behoorlicken

[fol. lxxi.v]

eedt ghedaen hebben als goede ghetrauwe, ende onderdaneghe subgijten schuldich sijn van doene hueren here, ende vrauwe schuldich sijn van doene, so eest dat wi doen te wetene allen lieden, die nv sijn ende hier naer wesen sullen, dat wi vp den yeghenwoordeghen dach van heden gheloeft hebben ende ghesworen in trauwen ende waer heden te houden, ende te doen houdene huer lieder preuilegien, vryheden, goede costumen, ende vsancien, beede houde ende nyeuwe, ende inder manieren datter ghecostumeirt es, die welcke preuilegien die waren inden handen van onsen voorseyde here ende vadere, ten tijden dat hy leuede, die wy vp den dach van heden weder ghegheuen hebben den voorseyde poorters habitanten ende den ghemeente van onser voorseyde stede, bi speciale gracie ende te haerlieder suplicatie, die welcke'preuilegien, vryheden, ende goede costumen, ende vsagien. Wi phelips ende Margriete voornoemt, al noch belouen deser onser letteren, loyalijcke ende ter goeder trauwen, te houdene ende te doen houdene goet vast ende van weerden, van pointe te pointe, als oft hier gheschreuen ende verclaert ware. Ende niet daer yeghen te commene of te doen commene, in eenegher manieren, behouden twee pointen. Te wetene dat al tghemeente van Brugge vander seluer stede ghegouuerneirt ende gheregiert si bi sesse connestablen, ende hoofmannen vanden.vi.sesten deelen vander seluer stede. Tandere, dat al tgoet vanden misdoenders, die bi wetten ende bi vanghenessen vander voorseyde stede ende bi schepenen verwonnen sullen worden van huerlieder meuten ende mesgrijpen by hem lieder ghedaen, yeghen den here ende heerschappye van ons, Phelips ende Margriete voorseyde, ende van onsen naercommers, grauen ende graefneden van Vlaendren, dat ons dit ghelieft ende ghelieuen sal den ghenen, die sake van ons hebben sullen, ende van onsen naercommende grauen ende graefneden toe behoren sal, ende gheconfisquiert sijn tonsen behouue, ende tonser tafelen gheleyt worden, sonder eenege dissumulacie ofte verdrach, ende nyet andersins. Vant welcke ons die voorseyde stede van Brugghe, ende dinghesetene van diere ghegheuen hebben hare letteren. Ende omme dat dit blijuen sal goet, vast ende ghestade, ten eeweghen daghen, so hebben wy dese letteren ghedaen seghelen, behouden in allen anderen saken onse rechten. Dit was ghedaen binnen onser stede van Brugghe, den xxvi.dach in April. Int iaer ons heren.xiij^c.ende.lxxxiiij.