stede, ende dat si oock som wel ghedroncken hadden, ende seyden datmen beyden soude tot des anderen daechs daer naer, ende dan soude die graue Lodewijc selue met die van Brugghe die van Ghendt bestrijden, want hi soude dan te velde commen, met alle die ghene die hem wel wilden. Desen raet en ghenouchde die van Brugghe nyet, maer sonder aduijs, ende sonder eenege hoofden, dye hemlieden bestieren mochten, liepen si sonder eeneghe ordonnancie ter Ghendt poorte huyt (by tropkins van.xij.of.xvi.oft.xx.te gadere, som meer som min als onbestierde dronckaerts, so si meughelic som waren, ende worden also altemet vanden ghentenaers doot ghesleghen, ghelijck kiekenen sonder eenege vroeschepe ofte weere, want die van Ghendt omringdense altemet met sulcken hoopkins als si te gader huyt liepen. Ende die van Ghendt quamen ende genaecten altemet lancx so naerder Brugghe. Ontrent den clooster vespertijt, so trac huyte mer Heulaert van poucke met sgrauen banniere tot Assebrouc. Ende daer wort gheuochten metdallen seere, ende heyndelic wort daer die heere van poucke versleghen, ende meest alle die hem volchden, so dat in die donckerhede vanden auende die van Ghendt in Brugge quamen ter ghendt poorten inne, dye slopene vonden, ende so ghinghen si totter marct, nyement hem lieden wederstaende. Ende aldaer deelden si hem in twee deelen, deene helft bleef die marct verwarende, ende dandere helft trac van straten te straten, maer Phelips van eertuelde hilt hem vp die marckt voor tbeelfroot, dandere ghinghen ter buerse, in die graeuwerckers strate, in sinte Iacobs strate, ende inden houden sack, ende aldaer slougen si al doot dat si in haren weghe vonden, als die makelaers, dye graeuwerckers, metten vleeschhauwers, die welcke meenden den ghentenaers te wederstane, maer sy vielen te cranck, omme dat si vanden anderen Brugghelinghen niet ghesercourst en waren. Dit ouermerckende die weuers ende die smeden, met heer Symoen cokermoes, dye welcke quamen ter marct bi die van Ghendt, ende si hilden hem met hem lieden. Ende die contrarie den ghentenaers waren, ofte in voorleden tijden eenich quaet van hemlieden ghesproken hadden, men slouchse doot Die graue Lodewijck hadde wel naer selue ooc doot ghesleghen gheweest, in sinte Amants strate van heer Symoens cokermoes knapen, haddent eeneghe nyet belet. Ende daer omme die Graue Lodewijc vloot huyt Brugghe, ende hy was met een cleen bootkin bi die minne water brugge ouer ghestelt tot buyten der veste, ende daer sadt hy vp een merye, ende reedt daer mede tot Roeselare, ende also voort tot Rijssele. Vp den sondach naer der processie, ende ooc des maendaechs, die van Ghendt roofden die stede van Brugghe, ende alle dye wethouders die si vonden, of die in die wet, of in sheeren dienst gheweest hadden, edele of onedele, die sloughense doot. Ende si ghinghen in sprinchen hof, ende nament al dat sy daer vonden, ende voerdent al te Ghendt waert, sonder die wijnen dye in sprinchen kelder waren, bet dan veertich vaten roots wijns, die sloughen si den boom huyte. Vp den vierden dach nader processie, twelcke was vp eenen dysendach, doe quamen dye ambochten van Ghendt met haren standaerden, staende ter marct, ende sy maecten doe eenen Pieter dye winter capiteyn van Brugghe. Ende tswoensdaechs so deden die van Ghendt vellen ende breken die drie poorten, dye welcke staen te Ghendt waert, te wetene die cruyspoorte, die Ghendtpoorte, ende sinte Kathelijnen poorte, ende men dede die vesten vullen metten steenen, so dat men vry commen mochte by daghe ende bi nachte in Brugghe, ende huyt gaen soemen wilde. Ende die van Ghendt namen te Brugghe in ghijsele vanden eerlijcsten vander stede, wel twee hondert persoonen, ende die hilden haer te Ghendt gheselschip.
Auteursrechtvrij
