Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dye van Ghendt met subtijlicheden wonnen dye stede van Oudenaerde.

[Sinte Pieters dach in Sporcle en den vierden dach in Meye]

[fol. lxvij.v]

ITem daer naer vp Sinte Pieters dach in Sporcle, dye van Ghendt quamen ende gherochten subtijlicken in Oudenaerde byder onvoorsienicheyt vanden ghenen dye dat awet ter poorten hilden, ende si quamen ter marct ende wonnen die stede, ende sloughen vele edele van sprinchen volcke doot, die binnen Oudenaerde laghen. Dit was al binnen tselue iaer van.xiij^c.ende.lxxix.dye van Ghendt trocken huyt Ghendt den vierden dach in Meye. Anno.xiij^c.ende.lxxx.ende ghinghen te Tielt, te deinsen, te Aeltre, ende van daer weder te Aelst, ende te Denremonde, ende also keerden si weder te ghendt. Ende vp den.xiij.dach van Meye, so quamen die van ghendt in brugge, ende gherochten tot vp die vrydachs marckt. Daer was seer gheuochten, ende daer bleuen vele van dye van Ghendt versleghen, ende ooc sommeghe van Brugghe, ende daer warer ooc vele vanden ghentenaers ghevanghen. Ende die van Ghendt hadden die meeste schade. Ende die van Ghendt treckende buyten der bouuerye poorte om te gane naer Dixmude, als si quamen ontrent sinte Michiels, siende dat si vele vromer lieden ghemisten, omme die te wrekene, soe keerden si weder omme in Brugghe tot vp die vrydachs marct. Nv es te wetene dat als doe dye van Ghendt hadden voor haerlieder parruere vp dye mauwen Liebaerts claeuwen, ende die paruere van die van Brugghe waren lelyen, ende vp die vrydachs marct vergaderden meest alle die van Brugge. Daer was seer gheuochten, ende daer waren meest alle die van Ghendt versleghen, die wederomme in Brugghe ghekeert waren. Ende omme dat die van Brugghen die victorie hadden, men sanckere een liedeken in deser manieren.

Claeuwaert claeuwaert
Hoet hu vanden lelyaert          ☩
Gaet ghi niet thuysewaert
Ghi laetter huwen tabbaert
Al waerdy noch so seere ghebaert
Sullen hu maken veruaert.

[Den eersten dach in Wedemaent, den achsten dach in Ougstmaent en den xxvi.dach in Ougst]

¶ Item daer naer vp den eersten dach in Wedemaent was Denremonde ghewonnen ende verbarnt. Vp den anderen dach in Wedemaent waren vele lieden van Brugghe ende vanden vryen ghevanghen, ende binnen Ghendt ghebrocht in sgrauen steen, ende waren som ghewisselt voor dye van ghendt, die te Brugghe daer te voren gheuanghen laghen. Voort die van Ghendt trocken huyte met tenten ende met pauwelioenen ter waelpoorte, ende meenden te commen naer Brugge. Dit verhorende die graue Lodewijc, hi versochte aen die van ghendt dat si met paeyse weder thuys keeren wilden. Ende daer was eenen paeys ghemaect, ende die graue Lodewijc quam binnen ghendt, ende men ghinc yeghens hem met processien, ende men ontfinckene met grooter weerdichede. Maer dien paeys en gheduerde niet langhe, maer spleet weder huyte, vp den achsten dach in Ougstmaent, omme dat die weuers tonder ghedaen waren, ouermits dat si den heeren van sprinchen weghe ghestelt, veronweerdt hadden, ende doot ghesleghen den hooch baliu van Ghendt. Hier omme die van Ghendt bereedden weder een groot heercracht van volcke, ende quamen te Dixmude, ende deden daer eenen grooten roof van beesten ende van andere goeden. Dit vernemende die van Brugge ende vanden vryen, quamen hemlieden bespringhen. Ende dit was vp den xxvi.dach in Ougst vp eenen maendach. Daer wort seere gheuochten, ende dye van ghendt worden daer meest al versleghen, ende die van Brugghe, metsgaders dye vanden vryen voornoemt namen al dien roof die die van ghendt te dixmude gherooft hadden, ende si brochtense te Brugge ter marct, men gaf eenen goeden wedre om.v.groten. Item een osse om.ij.schellingen. groten, ende een coe oft een veerse om.x.of xij.groten. Ende die capiteynen van Ghendt die desen roof hadden ghehaelt, waren voor desen strijt inden laetsten paeys rudders ghesleghen, omme dat sy vrome mannen van wapenen waren, als Boudin die vos, ende Mattheus van schathille, ende meer andere.

¶ Item vp den anderen dach in Septembre doe ghinc die graue Lodewijc met die van brugghe ende vanden vryen, ende meestal vlaendren volchde hem lieden, ende beleyden die stede van Ghendt.x.weken lanc. Ende nochtans duer al dat Ghendt beleyt was, die van ghendt sonden huyt soe vele volcx van wapenen dat sy beleyden Aelst ende Denremonde.

[fol. lxviij.r]

[In Octobre den.xxi.dach, in Nouembre den v.dach, de.xxviij.dach van Sporcle]

¶ Item in Octobre den.xxi.dach lachmen te swalmen, ende daer was een groot gheuecht ter langher brugghe, ende vp alder heleghen auent weder ter seluer brugge was seere gheuochten, daer vele brugghelinghen versleghen bleuen.

¶ Item vp alder sielen dach ende sdaechs daer naer, soe waren dye van Ghendt voor Gheerdtsberghe, twelcke si ghecreghen.

¶ Item in Nouembre den v.dach soe bleuen vele vanden vryen, ende ooc van die van Brugghe versleghen voor euerghem, ende die van Ghendt vinghen die sommeghe met haren standaerden, ende die voerden si binnen Ghendt, ende staken se daer ter veynsteren huyte, ter cleenichede van die van Brugghe, ende vanden vryen Ende vp sinte Maertins auent daer naer so wort den paeys ghemaect, ende die graue Lodewijck, ende alle die met hem voor Ghendt gheleghen hadden, trocken elck thuysewaert. Ende die paeys gheduerde ontrent.xv.weken, ende dat quam om tgheroofde goet dat te Ghendt stont te coope. Die van Brugghe ende van anderen steden ende dorpen, daer dat gherooft was, sy dedent arresteren met den here vp den.xxviij.dach van Sporcle, ende daer omme daden die van Ghendt eene nyeuwe wapenloopinghe, ende trocken weder huyte met eenen grooten heercrachte in vier ambachten, vp den.viij.dach in Meye.

¶ Item anno domini.xiij^c.ende.lxxxi.vp den.xij.dach in Meye, quamen die van Ghendt voor Cortrijcke, ende verbarnden die baelien, ende alle die huysen vanden voorboughen.

[Vp sinte Seruaes dach en vp den.xxij.dach in Wedemaen,]

¶ Item vp sinte Seruaes dach trocken die van Ghendt huyt met.v.heercrachten, dat een voer na Gheertsberghe, dat andere te denremonde, dat derde te cortijcke, dat vierde in vierambachten, dat vijfste te Deynsen ende te Neuele. Ende dit ordonneeirde haerlieder capiteyn Phelips van eerdtuelde, die welcke nyeuwelincx ghecoren was. Ende dye in die vier ambachten waren, die roofden al dat coorne dat syere vonden, ende si brochtent te Ghendt waert, ende die te Deynsen, ende te Neuele waren, die keerden weder omme te Neuele, daer si gheschoffiert waren vanden heeren, dye gheleghen hadden te Oudenaerde. Ende daer wort doot ghesleghen Raesse van Lyekercke. Ende daer omme die van ghendt in wederwrake, verbarndent al waer dat si quamen, Deynsen, neuele, Tielt, Aeltre, Vrsele, Eeclo, ende Maldeghem tot Brugghe toe. Ende in haerlieder wederkeeren, soe wordt Malen oock verbrandt, ende sy vinghen in haerlieder wech.xxvi.eerlijcke lieden, ende brochtense in Ghendt gheleet vp die marckt, ende daer waren sy met hamers ende met stocken doot ghesleghen vp den.xxij.dach in Wedemaent, twelck was een onredelick feyt sulcke verwonnen lieden, also doot te slane.

[Vp den.xxv.dach vander seluer maent en Vp den.xiij.dach van Ougst ]

¶ Item vp den.xxv.dach vander seluer maent doe was dat edel kijnt ende dat soete ionghelinck, dat commen was vanden bloede vanden coninck van Vranckerijcke, ende vanden graue van Vlaendren, dwelcke men hiet tkint van Adeghem, oock te Ghendt doot gheslegen. Vp den.xiij.dach van Ougst quamen vele vanden heren van Ghendt buyten der keyser poorte met sint Ioris banniere, ende riepen luyde Vlaendren ende den leeu, ende si bleuen aldaer ligghende.iiij.daghen lanc.

[Vp den xviij.dach van Ougstmaent en vp den.xvi.dach van Nouembre]

¶ Item vp den xviij.dach van Ougstmaent vp eenen sondach, so sachmen tsheren banniere ter marct, ende corts daer naer die van Ghendt trocken in vier ambachten om coorne, ende brochtens meneghen waghen wel gheladen, ende elck die brochte noch vele te halve ghedreghen. Ende hier naer vp den.xvi.dach van Nouembre quamen die van Ghendt Taxele, ende daer haelden sy oock veil corens, ende brochtent te Ghendt waert.

[Sdaechs voor sinte Andries auent]

¶ Item sdaechs voor sinte Andries auent was te Ghendt weder een groote wapeninghe, ende si ghinghen in vier ambochten, ende brochten vele wijns in Ghendt, dye si daer vonden, ende men riep den wijn met beckenen te Ghendt om twee groot den stoop, want diene brochten en haddender gheen quaet ghelt voren ghegheuen.

[Vp den.xix.dach in Decembre en Pauwels dach voor lichtmisse]

¶ Item vp den.xix.dach in Decembre, soe verloren theerschip ardenburch. Ende naer dat die van Ghendt die stede hadden gherooft, soe staken si tvier in die stede tallen houcken, ende verbarndense. Vp den anderen dach van Laumaent, soe was Gillis die vuldere, dye vpperste capiteyn van Ghendt doot ghesleghen. Ende vp sinte

[fol. lxviij.v]

Pauwels dach voor lichtmisse, doe was phelips van eerdtuelde die onder capiteyn gheweist hadde gemaect vpper capiteyn, ende rewaert van Vlaendren. Ende des vrydaechs daer naer doe swoeren die.iij.hooftmannen die met hem ghecoren waren. Ende tsondaechs daer naer ten elf hueren was die voorschepene vanden kuere heer Symoen bette doot ghesleghen, ende des dysendaechs daer naer so was Ghijsebrecht die gruutere doot ghesleghen vp dye collatie camere.

[Vp den.xxix.dach van sporcle]

¶ Item vp den.xxix.dach van sporcle, twelck was doe den asschewoensdach, doe was dat pas vanden.vij.eecken verloren.