Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
[Folio lxvi.v]
| |
sy gauense twee of drye reysen. Maer int iaer.M.iijc.ende.lxxix.doen seyden si goet ront dat sijse niet meer betalen en wouden, maer die van Brugge gauent hem gheerne, als die voorseyde graue Lodewijc yet aen hem lieden begeerde, si gauent hem, ende si sercoursdene, huyt den welcken hi wordt die stede van Brugghe beminnende, belouende ooc die van Brugghe, in dien dat si yet begeerden aen hem, hi soudt hem lieden doen ende consenteren. Ende daer omme so begheerden si aen hem, ende versochten omme te doen makene een ghedelf, van Brugge tot deinsen, maer sine edele ende sinen raet, ende dye van Ghendt en wildent niet consenteren. Die graue Lodewijc quam naer den Sinxene te Ghendt, ende beriep daer een ioustement vp den cooruaert, het welcke costede seere veel goets, ende die meeste edele van alle den lande, ontrent Ghendt gheleghen, dye waren alle daer, ende vele edele huyt Brabant, Holland, ende Henegauwe. Ende die graue begheerde weder eene grote settinghe ende sekeren tacx, vp elc ghemet lants al Vlaendren duere. Ende een poorter van Ghendt gheheeten Goosin mulaert dye wederseydet, als tghebodt ghedaen was, ende seyde. In ghendt noch in al thgendtsche, men weinschede den prinche niet een mijte te gheuen, om sine wellustigheit ende ghenouchte mede te voedene, ende om den cost die hi doet int ioustementen, in danssene, ende in reyene met vrauwen, met pijpers met sangers, ende met alle manieren van ionghe ende wulpschen ionghen volcke, die welcke hi rijcke maecte, ende seere aen hem profiteirden. Hi claechde sinen noot die van brugghe, die welcke hem gauen een groote somme van penninghen, vp dat si deluen mochten, van Brugghe tot Deinsen, want si hadde al dat lant ende den gront ghecocht, tot Deinsen toe. Ende elc mochte wel deluen ende stichten vp sinen gront, ende die graue Lodewijc seyde dat si stoutelic deluen souden die vaert, so wijdt ende so diepe datter al tiaer duere die pleyten varen ende keeren mochten, ende ontboot alle baliuwen ende officiers, dat so wie die van Brugghe eenich belet dade int deluen vander seluer vaert, datmen die in vanghenesse legghen soude yegen den prinche. Doe deden die van Brugghe ghebieden dat alle die ghene die metter spade wercken consten, dat si ten ghedelue souden gaen, men soudtse wel betalen. Ende als si ghedoluen hadden tot sint Ioris in Distele, ende si in ghendtsche deluen souden, dye van Ghendt ordineirden.C.ende.xx.witte capproenen stercke vrome mannen, ende si maecten twee capiteynen, Aernout die clerc, ende Symoen colpaert, diese gheleeden souden ende verbieden dat deluen. Ende waert bi also datter yement dolue naer tverbodt, datmen hem sine spade, ende andere alaem nemen soude, ende daer naer in dien sijt niet en lieten, dat mense doot slaen soude. Dese voornoemde witte capproenen quamen daer, ende verboden den deluers dat si niet langer deluen en souden, ende si lieten twerc staen, ende seydent dye van Brugghe, twelck die prinche vernam, die welcke weder omme gheboodt dat si deluen souden, ende sandt daer sine officiers mede, omme die beletters vanden deluene te vanghene. Maer als si daer quamen, so vonden sy doot ghesleghen dat meeste deel vanden deluers. Dit vernam wouter van hauterijne, die hooch baliu van Ghendt was, ende hy beual een sheeren knape, wiemen hiet Pieter coene, so waer datmen vonde eeneghe witte capproenen binnen Ghendt, dat mense vanghen soude ende leeden in sgrauen steen, die welcke voorseyde pieter vinc een wit capproen, dye welcke so seere riep dat vele lieden quamen huut haren huysen ghelopen, om den witte capproen te helpen dat hi ontghinge, maer die voornoemde pieter de coene bi sijnder vromicheyt dede so vele dat hi den witten caproen leede in die vangheness Des anderen daechs snuchtens, die capiteynen van den witte capproenen gauent te kennene den deken vanden weuers, dye welcke beual den ambochten dat si net wercken en souden voor dat die witte capproenen huyter vanghenesse ghedaen souden sijn, ende Pieter die sheeren knape ghepuniert. Ende hier omme waren alle die van Ghendt beroert, ende liepen alle ghewapent tot coutre, ende riepen dat si wilden blijuen bi hare vryheit, ende so wie dat beweeren wilde, hi soudt becoopen. Ende daer quamen vele ambachten met vele bannieren. Wouter van hauterijne die hoochste Baliu, metsgaders dye | |
[Folio lxvij.r]
| |
vander wet nam sgrauen banniere van vlaendren ende seyde, so wie den prinche helpen wilde ende met hem wesen, dat si hem volghen souden ende den standaert vanden prinche. Ende daer waren.iij.ambachten metsgaders den vleeschauwers dye des princhen banniere volchden, ende dit was vp den eersten maendach naer sint gillis dach. Ende die weuers metsgaders dat ghemeente sloughen doot den hooch baliu, ende al tghemeente bleef in die wapene staende. Ende dye weuers ende die witte capproenen te samen coren eenen capiteyn gheheeten Ian Lyoens, ende die ghinc met twee duysent mannen te Deinse, ende ooc in alle smalle steden, als Taelst, te Denremonde, te Nyneue, ende int wechgaen, si verbarnden tcasteel van wondreghem, ende alle die huysen die daer ontrent stonden, dat vier was soe groot datment sach ouer vijf mijlen. Ende dit was vp onser vrauwen dach in pietmaent als Ian Lyoens hadde een maent huyt gheweest van stede te stede binnen der casselrye van Ghendt, ende hadde tvolc ghedaen sweeren goet te blijuene met der stede van Ghendt. Ende commende ouer Eeclo daer sterf hy, dyes was in ghendt groten rauwe. Ende daer naer vp den xvi.dach in Octobre, omme dat die van Oudenaerde niet sweren en wilden met dye van Ghendt, daer omme beleyden die van ghendt die stede van Oudenaerde, ende bleuen daer ligghende tot vp sinte Barbelen auent in den aduent, ontrent.vij.weken tijts. Ende midts der groter coude diet begonste te sijne, so schieden si van daer ende trocken thuysewaert. Ende ooc die heren die in Oudenaerde waren met haren volcke, hadden meneghe sprincreyse ghedaen vp dye van ghendt voor Oudenaerde ligghende, so dat haer lieder ghetal van haren volcke seer ghemindert was. |
|