Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe dye Graue Lodewijck van Vlaendren voer in Brabant, bi Bruesele, ende daer veel van tshertoghen van brabant volcke verslouch.

[fol. lxiiij.r]

ENde voer met eenen grooten heercrachte in Brabant. Ende bi Bruesele was eenen groten wijch gheuochten, daer die hertoghe Ian van Brabant ghescoffiert was, ende vele Brabanders versleghen, in die octaue van sinte Laureins. Ende daer naer ghinc die graue Lodewijck noch diepere in Brabant, ende ghecreech noch eenen strijt te sandtvliet, daer ooc vele brabanders versleghen waren, ende int vlyen verdronckerder ooc vele Ende dat incarnatioen, dat dye vlaminghen hadden die victorie in Brabant, ende die brabanders verwonnen, staet in dyt woordt beteekent (Clijccum) Anno domini.xiij^c.ende lvij.doe quam die prinche van Waels, des conincx Edewaerts sone van Inghelandt, met eenen groten heercrachte van Inghelschen int lant van Poitau bi poitiers. Ende Ian die coninc van Vranckerijcke quam yeghen Edewaert met eender menichte van edelen rudders ende schiltknapen, ende versaemden ontrent.ij.mijlen buyten poitiers, au champ alexandre. Ende daer was eenen groten wijch gheuochten, daer vele edele van vranckerijcke doot bleuen, ende Ian die coninc van Vranckerijcke gheuanghen, ende phelips sijn ioncxste sone, die welcke waren den prinche van Waels gheuoert in Ingelant totten coninc edewaert sinen vadere. Desen wijch ghesciede in die maent van Octobre.

¶ Int selue iaer vp den kersnacht, gheschiede in Vlaendren groot iammere vanden watere, ende sonderlinge in dye vier ambachten, so datter vele menschen ende beesten verdroncken, ende kinderen in die wiege liggende, ende vele huysen dreuen wech.

¶ Int iaer.xiij^c.ende.lviij.vp den versworen maendach naer paesschen, die lootghieters souden dye voyen van sinte Saluators kercke sauderen, ende vermaken, ende sy ghingen ter taueerne waert, ende van daer in die stoue. Daer bleuen.ij.pannen met gloeyende colen in die voye vander kercke, ende het woey seere, ende die colen woeyen achter en voren lancx der voye vander kercke, so dat die kercke ontstac, ende verbarnde dye kercke, ende den schonen choor. Ende dat incarnatioen van desen staet hier inne bewesen.

¶ Lux luxit in signis tunc turris cum ruit ignis.

¶ In dat selue iaer rees dat ghemeente in vranckerijcke yeghen die heren, ende daer worden vele heren doot ghesleghen in Wedemaent, ende men hiet die vpstelders van dien, de iacquets.

¶ Anno domini.xiij^c.ende.lx.wast eene groote sterfte vander haestegher doot, dye lieden waren smorghens fray, snoens siec, ende des auents doot.

¶ In dyt selue iaer waren te Brugge vele edele mannen huyt Vranckerijcke, als die hertoge van angiau, van bretaengnien, van bourbon, ende noch vele andere, die prinche van Waels sconincx sone van Ingelant, ende die.ij.cardenalen. Ende daer was die paeys ghemaect tusschen dye.ij.coninghen, ontrent half Meye. Ende die coninc van vranckerijcke wordt ghedeliuereirt, int iaer als voren huyt Ingelant, maer den paeys en gheduerde niet lange.

¶ Anno domini.xiij^c.ende.lxi.was eenen vreeselicken brant in aelst, dat die spaercken tot bi Ghendt vloghen metten winde. Ende dit ghesciede vp den.ix.dach in maerte, ende die asschenen vloghen tot in dye stede van Ghendt.

¶ Anno domini.xiij^c.ende.lxij.so verbarnde te Ghendt den gans driesch, byder byloke tot by sinte Pieters dorp. Dit vier begonste des anderen daechs in Meye.

¶ Ende int selue iaer binnen der seluer maent was eenen vreeselicken brant binnen Brugghe, so dat in Groeninghen nauwe een huys en bleef staende, ende van daer tot sinte Kathelijnen poorte, ende het vier vlooch tot byder Ghendt poorte, ende desen brandt gheduerde byden vier daghen lanck.

¶ Ende in Oostmaent was in ypre eene groote verkeeringhe,

daer omme dat vele lieden te voet ende te peerde ghinghen tot Oudenaerde, ende ontrent den.xiij.dach van der seluer maent, wast sulc eenen wint, dat vele torren, huysen, ende muelenen omme woeyen, ende boomen sonder ghetal, ende corts daer naer wasser eenen groten brant in die stede vander sluys.

¶ Item int iaer xiij^c.ende.lxiij.in Hoeymaent, so quam die Coninc van cypers in vlaendren, omme secours, want die sarasijnen hadden al sijn lant gedestrueirt.

¶ Item int iaer.xiij^c.ende.lxiiij.rees een orloghe tusschen den graue van Vlaendren, ende den hertoge Aelbrecht, om dat die hertoge Aelbrecht dede te kennoot doot slaen des grauen Lodewijcx neue, die here van Eynghen.