Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
[Folio lxiij.r]
| |
ENde daer dye schepenen saten, daer en waren gheene cussens voor hemlieden gheleyt, daer bi leyden si of hare mantels, ende leyden die onder hemlieden, ende saten daer vppe Die van Brugghe hadden seer costelijcke mantels met bordueringhe, ende ooc met costelicke voeringhen. Ende als dye maeltijt in des Conincx pallaeys vulcommen was, ende si vpstaen souden, heer Symoen van eertrijcke, dye doe Burchmeester van Brugge was, beual al sine medeghesellen dat elck sinen mantele soude laten ligghen daer vp dat si gheseten hadden. In dat scheeden vanden coninc, ende oerlof ghenomen hebbende, ende wech gaende, ende men riep luyde, messeigneurs de Bruges vous auez laissiez vous manteaulx fourez. Ende heer Symoen van eerdtrijcke, Burchmeester van Brugghe antwoorde, seggende aldus. Nous de flandres nous ne sommes point acoustumez ou nous disnons de emporter auecquez nous les coussins. Ende die graue Lodewijc soude trecken te Vlaendren waert, maer die coninc seyde, hi wilde metten graue commen eten, eer hi vertrocke. Ende die coninck dede beuelen en verbieden al Parijs duere, dat men den graue Lodewijc, noch nyemende van sinen volcke eenich hout en soude vercoopen. Die graue Lodewijc dit vernemende beual datmen alle die dueren ende die veynsteren vanden huyse of doen soude, ende datmen daer mede die spijse soude bereeden, ende hi dede coopen ende ontleeenen vele pladen, ende marberijnen nappen. Ende als die coninc soude commen ter maeltijt, omme te gaen sittene, daer ne was gheen vier ghemaeckt in die sale. Doe so sprac die coninck, o mon beau cousin de flandres, hoe commet dat ghy gheene turuen mede en brocht huyt Vlaendren om hu te Parijs te waermene, ende vier daer of te makene in desen couden wintere. Dye graue Lodewijc antwoorde den Coninck, ende seyde. Och edel coninck men sal hu terstont een beter ende een costelicker vier maken, dan men in v pallaeys ghewuenlic es te makene. Ende die Graue Lodewijc beual datmen die marberijnen, die pladen, ende nappen niet sparen en soude, maer datmen den coninck een vier daer afmaken soude Anno.xiijc.ende.Li.so was eenen grooten wijch te schepe vp dye zee byder mase, ten swarten wale, tusschen Willem Lodewijcx van Beyeren sone, nyeu graue van Hollant, ende tusschen der Keyserinne sijnder moeder, wedewe van Lodewijc van Beyeren, die welcke wilde selue besitten dat graefschip van Hollant, na der doot van haren man den Keysere Lodewijc. Sy nam mede te harer helpe, die van zeelant, sonder middelburch ende Walcheren, ende si dede commen huyt Inghelant vele artchiers, ende nam mede met haer sommeghe ballinghen, die heer van Pollaene, die heere vanden Lecke, ende mer Willem van Duueuoorde. Si dede vele schaden int lant van Walcheren si dedet al berouen, ende tvolc doot slaen, ende alle dye dorpen verbranden ende in gloede stellen, ende commende naer Holland met eene groote vlote van schepen, daer die here van Engien amyrael of was. Die graue Willem huer sone, metsgaders die van Hollandt, quamen huer te ghemoete, ende hueren voorseyde gheselschepe, ten swarten wale, ende daer so wort sy ende al huer gheselschap gheschoffiert, die Ingelschen, ende die heeren, ende alle die zeelanders die met haer daer waren, worden daer alle versleghen, ende Willem haer sone behilt tgraefschip van Hollandt, ende van zeelant, ende die heerschappye vanden Vryesen.
¶ Int selue iaer wast eenen horribel somere van hitten, dat al tcoorne bedarf, ende een hoedt corens galt ses gouden schilden, ende in Vranckerijcke.ix.gouden royalen.
¶ Item int selue iaer was te Cortijcke, inden aduent een ondersouck ghedaen van grooten clachten ende foortsen die daer ghebuerden, ende die here van halewijn, die heere van spyere omme haer lieder ouerdaet waren daer onthooft.
¶ Anno domini.xiijc.ende.lij.dye Graue Lodewijc dede sinen vadere Lodewijc van Nyueers, die inden wijch te Kerssy versleghen was, ende begrauen int cloostere van sinte Rijchiers in Pontieu, hi dedene ontgrauen, ende voeren te Brugge, daer hi met groter solemniteyt begrauen was te sinte Donaes, inden choor voor den hooghen outaer.
¶ Anno domini.xiijc.ende.liij.vp.s.Gregorius dach, inden Maerte wast een horri- | |
[Folio lxiij.v]
| |
bel wint, die vele schaden dede ter zee ende ooc te lande. Binnen deser tijt, die graue Lodewijc was een blijde ende ghenouchlic heere, ende hy hadde groote ghenouchte in musychienen ende ghesellen van ghenouchten. Ende het gheuiel dat een ionghe dochtere byden graue sliep ende wort beurucht van twee knapelicke kinderen. Ende als si gheligghen soude, die graue was in Vranckerijcke, ende daer omme wast gheseyt der graefnede Margriete, dat si helpen soude die kinderen tot haren kerstendomme, in die stede van den graue Lodewijc haren man. Die graefnede beual datmen tvraukin te Male bringhen soude, omme daer te gheligghene, ende daer niet langhe gheweest hebbende, ghelach van twee knapelicke kinderen, welcke niet lange en leifden. Maer die graefnede Margriete, als dat vraukin daer ghecommen was, eer si noch ghelach, dede haer den nuese of snijden, ende binnen twee daghen daer naer ghelach si als voorseyde es Ende binnen.vi.daghen daer naer dat tvoorseyde vraukin die nuese of gesneden was, so starf si ook, ende men seyde dat sijer ghenouch toe geholpen was Dit ghedaen sijnde, als die graue in Vlaendren commen was, ende verstont ghenouch dat dye Graefnede Margriete, hadde tvoorseyde vraukin doen dooden, bi rade vanden Hertoghe Ian van Brabant hueren vadere, ende by sinen consente dedese die graue metsen in eenen muer, daer sy bleef, tot dat sy starf.
¶ Anno.xiijc.ende.lv.midts dat die graue Lodewijc hadde ghehadt in huwelicke, bi den acht jaren die schone Margriete tshertoghen Ians van Brabants dochtere. Die voorseyde Hertoghe Ian van Brabant en wilde den graue Lodewijc niet gheuen tghene, dat hi hem met sijnder dochter Margriete belooft hadde. Ende aldus lange ghetardeirt hebbende vanden vuldoene vander belofte, die graue Lodewijc wort gram, ende ontseyde den Hertoghe Ian van Brabant. |
|