¶ Hier dient ghenoteirt, twelcke ghebuerde een deel tijts hier te voren, mer was hier in vergheten te scriuene vanden goeden keyser heyndrick.
ANno domini.xiijc.ende.viij.Heyndric van Vlaendren graue van Lutcenburch wordt byden ghemeenen cooruorsters vanden rijne ghecoren ouer eenen coninc ende keysere van Roomen te sine, ende hi badt sine ooms dat si wilden taken commen bi hem, omme hem te eruene, want hi moeste daer sine crone ontfangen. Daer quamen tot hem sine ooms, als die ghebroeders van sinen vadere. Eerst Ian die bisscop van Luydeke, Phelips van Namen, Guy van Vlaendren, Robrecht graue van Vlaendren met sine twee sonen, Lodewijc ende Robrecht, Mattheus here van Loraynen, die here van sinte Goubaen, dye here van couchy. Dese heren waren sgrauen Robrechts dochteren mans, die welcke heren quamen daer seer notabelicke, ende met grooter cierhede binnen der stede van Aken, ende alle dese heren waren ghecommen vanden graue Guy van Vlaendren Ende die van Aken deden den voorseyde keyser Heindric hare poorten opene, ende ontfinghen hem met groter eeren ende weerdicheden, ende wordt aldaer ghecroont metter stalen croone, ende hadde daer sijn gheploghene recht.
¶ Item van Aken so trac hy voort te vranckeuoort, ende die voornoemde heren, die kinderen vanden graue Guy, ende ooc huerlieder kinderen trocken metten keyser te Vranckeuoort, daer hi ende si lieden eerlicken ontfanghen waren, ende hi ontfinc aldaer die ander croone. ende hi bleef daer alle dien winter duere. Sijn ooms ende sine rechtsweers, ende alle die heren namen oerlof aenden Keyser Heyndrick, ende elc voer te sine landewaerts. Het was daer een segghen in duytsche lant, dat binnen corten iaren, die vlaminghen, metsgaders die hulpe vanden keyser Heindric souden den Coninc van Vranckerijcke, ende al sijn lant tondere bringhen, ende also ouerheer worden van der croone, ende van alle den walschen lande. Dese nyeumare quam te Parijs, ende voor den coninck Phelips huyten welcken hi wordede gram, ende vergaderde al tghemeente van Vranckerijcke, ende badt den Graue van Sauoyen, van Foys, ende van Ermengac, ende gaf hem lieden saudye, ende quamen te vlaendren waert, omme dat te nyeuten te doene, ende quamen tot Aryen. Ende die coninck hoorde segghen dat die vlaminghen hem vp sijn comste voorsien hadden, ende dat si vromer waren dan hi, ende dat haerlieder volc bet was ghewapent, dan tsijne, so dat hi niet en dede dat hi meende te doene, maer vloodt, ende track weder omme met sijnen volcke te Parijs waert. Ende van dier tijt voort so sochte hy middel ende maniere hoe datmen den keyser Heindric soude moghen ter doot brenghen, ende doen steruen bi venijne. Die Coninc Phelips van Vranckerijcke ende die Coninc van Nauaren, dese namen in hueren raet dat een meester van groter namen, gheboren van Mylanen, ende was gheheeten meester Bernardus de monte pesano, al datmen dien gheuen soude een eerlic Bisschopdom ende hy soude hebben een beuel oock vanden paeus, om te wesene een cappellaen, ende biechtuadere vanden Keysere Heyndrick. Ende ouermits dat die keyser was meester in aerten, ende ghelicentiert in Loyen, hy was seere deuoot, ende plach dicwille vp hoghe feesten dat heleghe sacrament tontfane Aldus byden beuele vanden paeus ende ter bede vanden voorseyde twee coningen, die voorseyde meester Bernardus nam tlast den keyser te vergheuene, ende hi track van Parijs te sijnen lande waert, te Mylanen. Ende ontbeydende den keyser, corts naer paesschen soe track die keyser van Vranckeuoort te Mylanen, om sine derde croone, ende die van Mylanen ontfinghen hem met groter weerdicheden, ende hi ontfinck daer sine derde croone. Ende dese meester Bernardus was wel bekent metten keyser, want als die Keyser te Parijs ter scholen lach, ende studeirde in decreten, si woonden deen byden anderen, ende die Keyser ontfinckene als een confessuer tsinen rade, ouermidts dattet ooc tspaeus wille was ende begeerte. Ontrent.s.Luycxdach voer die Keysere te Pysen, ende vp den alre heleghen dach daer naer smorghens, so nutte die voorseyde goede keyser Heyndric met grooter deuocien dat heleghe Sacrament, ende als hijt ghenut hadde, men schanc
Auteursrechtvrij