Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Den wijch van Kerssy.

[fol. lvij.r]

LOdewijc die graue van Vlaendren, die graue van Alenchon, van Erricourt, ende vele edele princhen vochten yeghen die Inghelschen. Die fransoysen waren bet dan.L^m.sterc, nochtan die coninck van Inghelant hadde dye victorie, duer al dat hy nauwe hadde.xvi.duysent mannen, twelcke dede tverraet schip vanden graue van Alenchon. Maer dient genoteirt, hoe hier die coninc van Ingelandt eer hi ouer quam, screef schimpege letteren aen den Coninck van Vranckerijcke aldus luydende.

¶ Nous signifions a vous Phelippe de valois marchant de feil en franche que vous venez a sens en ponthieu nous vous attenderons. etc. Ende dye coninc.van Vranckerijcke screef hem weder omme aldus, als hier naer volcht. Nous phelippe Roy de franche a toy rescript, qui es marchant angloys des laynes, et pour ce que tu nas point grandement gaingne a tes laynes, mays as assez perdu, et pour ce que tu nas cure daller en engleterre, et es deuenu robeur et pilleur des poures gens de Franche et murdrier, mes nous te viendrons visiter en brief escript a Parijs la vigile de lassumpcion de la glorieuse mere de dieu. etc. Die coninc Phelips van Vranckerijcke quam met.lx^m.mannen sterc, ende hy duchtede dat hem die.coninc.van Ingelant ontgaen soude. Ende dese.ij.coninghen vergadereden bi Abbeuyle in Pontieu, inden bosch van kersy. Die.coninc.van Ingelant hadde lieuer eerlicken te steruene voor sijn recht, ende dat te beschermene met ten sweerde, dan schandelicke den Coninck van Vranckerijcke te ontvliedene, niet yeghenstaende dat hy daer maer bi hem en hadde ontrent.xi.duysent mannen, ende hi sach dye fransoysen in so groter menichte yegens hem commen, als voorseyt es. Ende daer omme maecte hi drie scharen van sinen volcke, ende stelde sinen sone den prinche van Waels in die eerste, met.v.duysent mannen van sinen vroomste lieden van wapenen, ende hi ordonneirde metten anderen.vi.duysent mannen twee andere scharen, die sinen sone den prinche van Waels, in dient noot ware ten onderstande commen souden van twee siden aen, so si deden, hoe wel dat sy lettel ende in cleender menichte waren. Die coninc Phelips van Vranckerijcke ordonneirde oock sijn volc in drie scharen ofte battaelgien, waer of waren in die eerste schare alle dye machtichste ende meeste princhen, te wetene al voren die Keyser, die coninc van Bemen, dye graue Lodewijc van Vlaendren, die graue van Alenchon, tsconincx broeder van Vranckerijcke, ende die graue van Aricourt, so dat si waren in die voorseyde eerste schare, bet dan.xx.duysent starck, wel ghewapent, ende alle te peerde, nochtan ghecreghen die Inghelschen dye victorie, maer dat quam toe by eenen verraetschepe vanden graue van Alenchon, dye welcke verradelick doot slouch inden wijch den graue Lodewijc van vlaendren Dit siende die here van ghistele, wrack sinen here ende graue, ende slouch doot den graue van Alenchon daer soubijt ter seluer stont, dye welcke heer van Ghistele worde daer seere ghequetst vanden here Gautier Le gryse. Ende die vlaminghen worden vechtende yeghen die noormantsche heren, omme te wrekene hueren natuerlijcken here ende prinche. Ende die fransoysen ende die noormans worden vlyende, ende hiermede worde den wijch verloren, midts dat die coninc phelips van Valoys coninck van Vranckerijcke vloodt tot Amyens toe, ende Lodewijc van male sgrauen Lodewijcx sone en was doe maer oudt.xvi.iaren, nochtan was hi daer mede in dien strijt, daer hi ooc seere ghequetst was, maer hi volchde den coninc phelips van vranckerijcke Tamiens binnen, daer dedene die coninck meesteren ende ghenesen.

¶ Item desen wijch gheuiel vp Sinte Berthelmeeus auent,

den.xxiij.dach in Oostmaent. Anno domini.M.CCC.ende xlvi.Ende naer dat die coninc van Inghelandt met sinen volcke van danen vertrocken was, die ionghe Graue Lodewijc van Male dede den lichame van sinen vadere soucken onder die versleghene doode lichamen, ende dedene eerlicke begrauen te sinte Rijkiers te Pontieu int cloostere. Maer ouer.vi.iaren daer naer, so was hi ontgrauen, ende die graue Lodewijc van malen dedene voeren te Brugghe, ende met grooter solempniteyt wedere begrauen tsinte Donaes, inden choor voor den hoghen outaer. Anno domini.xiij^c.ende.lij.