Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
¶ Dat.xxxi.capittel.![]() | |
[Folio l.r]
| |
LOdewijc.f.Lodewijcx van Nyueers ende van retheers van Bourgoengien palatin ende heere, hi was die.xxv.graue van Vlaendren, corts naer die doot vanden goeden Robrecht sinen groothere, so waren haestelicke tot hem ghesonden te parijs vanden notabelsten persoonen vanden drie steden van Vlaendren, als dat hi quame te sinen lande van Vlaendren, twelcke hem toe behoorde, ende verschenen was byder doot van sinen grootheere, den graue Robrecht. Die voorseyde Lodewijc quam te Vlaender waert metten notabelen vanden.iij.steden, sonder oerlof te nemene aen sinen oom den coninc Kaerle, ende sonder manschip te doene vanden graefscepe van Vlaendren. Ende hi in vlaendren commende, was eerlicken ontfanghen, ende blijdelicken, ende in allen steden als lantsheere ghehult, ende die leenhouders deden hem manscip, hi vermaecte die wetten ende die officien. Binnen deser tijt, so ontboodt die coninc Kaerle al sine edele te sijnder brulocht, want hi nam te wijue Marien van Lutcenburch des goets keyser Heyndricx dochtere, die welcke Keyser heyndrick daer naer vergheuen wort met venijne. Ende dese Marie was sustere vanden coninc van Bemen, ende dese brulocht worde ghehouden te prouijns met groter solempniteyt, ende daer quamen hem presenteren dir voorseyde Lodewijck van Nyueers, ende Mattheus van Loraynen here van saint Goubaen, inden name van sinen wijue, des goeden grauen Robrechts dochtere, ende elc seyde van hem tween dat si meest rechts hadden aen tlant van Vlaendren. Lodewijc seyde omme dattet ghesloten was inden paeys tusschen Vranckerijcke ende Vlaendren voor sinen groothere den graue Robrecht, dat die coninc phelips die lange, mi soude gheuen sine dochter te wijue, vp dye condicie dat ic soude sijn graue van vlaenderen, al waert so dat mijn vader storue, voor mijnen groothere Robrecht, also dat nv gheuallen is, ende mijn oom die ionghe Robrecht, ende mijn moeye die vrauwe van couchy, omme te vulcommene den ghestadigen paeys, renonchierden ende ghinghen te buyten ende wederseyden alle rechten die hem lieden van Vlaendren mochten worden ofte toecommen in naercommende tijden. Mattheus van Loreyne seyde al wast dat sijn oom Robrecht ende die vrauwe van Couchy sine moeye, haer rechten sijn te buten ghegaen, ende hebben quijte ghescolden so begheere ic by naerhede, want mijn wijf die haer lieder sustere es, ende ooc dochtere van den Graue Robrecht, sy en heeft haer deel oft recht niet quijte ghescholden noch te buten gegaen, ende aldus midts dat sijs beede te buten ghegaen sijn, ick begheerdt by naerhede te hebbene, dese Lodewijc ende matheeus elc Vlaendere begheerende so comt Robrecht van Cassele, als een eenich sone van Robrecht den Graue van Vlaendren te Parijs voor den coninc Kaerle, ende hi begheerde hem manscip te doene vanden graefschepe van Vlaendren, ende dier ghelijcke so seyde die Heere van Goubaen, als die ghene die naerdre was, want hi en hadde noeyt sijn recht quijte ghescholden, noch te buten ghegaen. Ende al dese heren ghehoort hebbende al haer lieder redenen, dye coninc stelde hemlieden dach te commen, vp sinte Andries dach te Parijs. Bynnen deser tijt, so ghinck die graue Lodewijc weder in Vlaendren, ende hy sadt daer ter audiencie van diuerschen causen, als Graue vanden lande, ende hi slichte die questyen, ende hi haelde dye ballinghen inne, ende dede hem lieden gracie, ende ontslouch alle die gheuanghen vanden steene, die nyet te vele mesdaen en hadden. Die graue van Namen heere vander sluys quam tot Lodewijc sinen neue, ende begheerde eene ghifte te vercrijghene aenden seluen Lodewijc, te wetene dat Baliuschip vanden watre, ende ooc omme dattet soude wesen annex der heerscapye vander sluys, die graue Lodewijc consenteerdet hem, ende gaf hem daer of beseghelichede, omme welc consent was sluys verbarnt ende te nyeuten ghedaen, ende ooc was die graue van Namen te Brugge inden steen geleedt ende daer gheuangen, ende corts naer sint martins messe, voer Lodewijc te Parijs waert omme te wesene ter dachuaert vp sinte Andries dach die daer gheleyt was, ende commende voor den coninc, so wart hi ghewroucht dat hi wet ende vonnesse ghedaen hadde, ende remissie ghegeuen den mesdadighen, ende dye wetten vermaect hadde, duer al dattet graefscip stont in callaengien. Ende dandere schenen meer rechts te hebbene aen tvoornoem | |
[Folio l.v]
| |
de tgraefscip dan hy, ende in teekene der mesdaet, so was die graue Lodewijc gheleyt in chastellet, te Parijs gheuanghen, ende daer naer in louuers. Ende hy was kersauende ghedeliuereirt, ter bede van mer vrauwe van Artoys, ende van sinen wijue. Ende des saterdaechs voor onser vrauwen dach te lichtmisse, so was die questie ghesleten by den ghenooten van Vranckerijcke, dat Lodewijc soude besitten ende hebben dat graefscip van vlaendren, ende sdaechs naer lichtmesse, soe dede hi den coninc Kaerle sinen oom manscip vanden tween graefscepen, te wetene van Vlaendren, ende van Nyueers, ende hy quam te Vlaenderwaert, ende daer waren alle manschepen ende preuilegien, costumen, ende rechten ghesworen te houden van allen landen ende steden. Ende omme dat hi de graue van Namen sinen oom toe gheseyt hadde die baliuwagie vanden watre ter Sluys, ende van te coopene ende te vercoopene coopmanschepen van groten ghewichte binnen der sluys, ende hem dat hadde besegelt contrarie den preuilegien vander steden van brugghe, so rees den twist als hier naer volcht. |
|