Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Thomaes van Sauoyen, den.xxi.Graue, die welcke tgraefschip behuwede aen Iehannen Ferrants weduwe.

Dat.xxvij.Capittel.

THomaes van Sauoyen behuwede ooc tgraefschip van vlaenderen aen Iehannen Ferrants weduwe, hi was die.xxi.Graue van Vlaendren, ende was seer goedertieren, ende ghemeyne met elckerlijck, ende hi en hadde oock gheene kijnderen by Iehannen sinen wijue, si waren ontrent.xij.iaren te samen in huwelicke. Iehanne die graefnede worde siec, ende ghecreech een barnende cortse, waer af si starf te Rijssele. Anno domini.xij^c ende.xliiij.Ende licht begrauen in tclooster ter Marckette, bi Ferrant haren eersten man. Ende omme dat dye voorseyde Iehanne gheene kijnderen en hadde, by gheen van haren mannen, soe gheuielen die twee Graefschepen ende quamen toe, te wetene Vlaendren ende Henegauwe, vp

[fol. xxxix.v]

Margriete huere sustere, dye die ionckste dochtere was vanden keyser Boudin, dese Margriete hadde te manne Willem van Dampyere. Item als Iehanne doot was men gaf Thomaes van Sauoyen een somme van penninghen, ende hi voer te sinen lande waerdt te Sauoyen.