Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Willem van Dampyere, den xxij.Graue, die welcke behude tgraefscip aen Margriete die ioncxste dochtere vanden Keyser Boudin.

¶ Dat.xxviij.Capittel.

WIllem van dampiere die quam tot tgraefschip van Vlaendren ende van Henegauwe, vansijns wijfs weghe Margriete die hi getraut hadde, dese willem was die.xxij.graue van vlaendren, ende si hadden te gadere drie sonen, Willem, Guy, ende Ian. Maer eer Willem margriete nam so hadde si ghehadt secretelicke twee natuerlicke cnapelicke kijnderen, als Boudin ende Ian van Auennes, den houdtsten bastaert, boudin voorseyde cabbelde ende keef alden dach yeghen den houdtsten ghetrauden broedere willem ghenaemt, ende si vochten dicwille onderlinghe. Dese willem die getraude sone seyde dat hi naer sijnder moeder doot, meende graue van Vlaendren te sine, want bastaerden en mochten gheen leenheeren sijn bi versterffenissen, aldus en mochte tgraefschap hem niet toe commen. Item Boudin die bastaert seyde, dat in sommeghe landen niement bastaert en es van sijnder moeder weghe, omme deser cabbelinghe ende kijuinghe wille so dede die graefnede margrieten willem hueren ghetrauden sone huwen aen vrauwe Beatrijce des hertoghen heyndricx van Brabandts dochtere, ende gafser mede dat graefschap van Vlaendren. Ende waert bi aldien dat willem storue voor die voorseyde Beatrice, so soude beatrice hebben thuerer duwarye Cortrijcke metter Casselrye, ende beatrice dede maken dat Clooster te groenijnghen buyten Cortrijcke, ende daer licht si begrauen, ende willem die licht begrauen te selines in Henegauwe. Willem van dampyere dye ionghe Margrieten sone, die si hadde bi willem van dampiere, soude geweest hebben die.xxiij.graue van vlaendren vp condicie, storue hi sonder hoir van beatricen sinen wijue, so soude sijn vrau moeder weder al Vlaendre hebben, sonder Cortrijcke metter casselrye, dat soude sijne wedewe beatrice des hertoghen van Brabants dochter houden voor huere duwarye. Ende Guwy die andere sone soude hebben dat graefschap van Henegauwe naer vrauwe Margrieten doodt, ende Ian die derde sone die heerscappye van sinen vadere dampiere die twee bastaerden boudin ende Ian hare natuerlicke kijnderen, omme dat si parlementich ende twistich waren, so en wilden si hemlieden niet gheuen. Maer sy seyden waert so dat sy haer vriendelic anthierden ende dienden haer ende haer lieder getraude broeders, si soude in nacommende tijden wel om hemlieden peynsen ende gheuen hem lieden wat in testamente naer haer lieder dyenst ende verdiente naer hare doodt, dit horende dese twee bastaerden Ian ende boudin, trocken bi den coninc sinte Lodewijc van vranckerijcke, ende clagheden hem seere ouer haer vrau moedere, ende ouer haer lieder drie ghetrauwede broeders, hoe die vrau

[fol. xl.r]

we margriete haer lieder moedere alle die heerscappyen bestelt ende ghegheuen hadde, haer lieder ioncste broeders, ende si lieden dye de oudtste waren en hadden nyet. Ende voordt soe wilde haerlieder vrauwe moedere dat si lieden die dye oudtste waren souden moeten dienen haer ioncxste broeders. Ende baden haren neue sinte Lodewijc den coninck, dat hy haerlieder moeder, ende den ionghen Willem van Dampiere wilde doen daghen te Parijs ter Marberijnen tafele. Dit ghedaen sijnde, ende si lieden commende te Parijs ter Marberijne tafele ten daghe ghespecificiert. Ian die houdtste bastaert proponeirde voor den coninc sinte Lodewijc, hoe dat sijn moeder wech ghegheuen hadde die landen, Vlaenderen, ende Henegauwe, hare ioncxste kinderen, maer Ian ende Boudin die houdtst waren (al wast dat si bastaerden waren) si en hadden niet dan slauernye van dienste van haer lieder moeder, ende huer ionghe broeders soudent al hebben. Die coninc sinte Lodewijck vraechde vrauwe Margriete wat sijer yeghen segghen wilde. Vrauwe Margriete seyde. Edel coninck ende neue wat dat ic van Vlaenderen ghetermyneirt hebbe, ic wil dattet so blijue, toebehoorende Willem van Dampiere mijnen houdsten wettelijcken ghetrauden sone, het en ware dat hy voor my storue, sonder hoir van Beatricen sinen wijue, so soudic Vlaenderen weder te mywaert nemen, mijnen ioncxsten sone Ian en mach ick niet ontnemen sijn vaderlijcke erue, maer Guy gaf ick Tgraefschip van henegauwe, maer midts dat hi ontschaecte des Aduocaets dochtere van Bethune, die hy moeste nemen te wijue, yegens den raet van hu ende van mijnen man Willem, ende van alle onse vrienden. Aldus heer coninck ende neue doet met Henegauwe huwen wille, maer ic wilt behouden mijn leuen lanc. Doen sprac die coninc Lodewijc Ach nichte van Vlaendren in al dat ghy gheseyt hebt, so ben ick wel ghepaeyt, ende wilt doen naer huwen goetdijncken. Doen sprac haestelic die bastaert Boudin die houdtste sone. Och vrau moeder, ic ben doch hu oudtste sone, ende sal ic niet hebben, Vlaendren dat ghi Willem mijnen broeder hebt ghegheuen, het behoort bet mijne dan hem toe, want hi iongher is dan ick, ende ick beloue hu dat hijt nemmermeer met payse van mi besitten en sal. Doen sprac vrauwe Margriete, hi is beterder ende edelder dan ghy sijt, naer alle wetten ciuijle, ende naer die wet gods, ende hy is edele van gheboorte, ende ghetrauwet kijnt, ende ghy sijt onhedele van huwes vaders weghe, ende sijt een bastaert Doen seyde Boudin, god moets iammeren dat ic dan een loddeghe hebbe tot eender moedere. Ende vrauwe Margriete verantwoorde, ach laten gode van hemelrijcke ende hu ende my machs wel iammeren, dat ghi hadt eenen lodder pape tot eenen vadere, sidy nv weltevreden dat elckerlijck moet weten huwe edelhede. Och lieue sone hebdy ons doen daghen om hu seluen ende ons allen voor alle die werelt te scoffierne, sonder twijfele also langhe als ic ende ghi leuen sult, en suldi van mi niet hebben, ende ick ontsegghe hu huwen dienst, ende verbiede hu mijn oghen ende mijn lant van Vlaenderen, also langhe als ic leue. Doen sprac die coninck, och nichte ghi hebt mi Henegauwe ouer ghegheuen, ende dat te mijnen segghene, so segge ic nichte, also lange als ghi leift, so sult ghi henegauwe besitten, ende naer huwe doot, so salt hebben Guy, ende sal sine twee bastaerde broeders voorsien ende houden, Boudin ende Ian, ende Willem van Dampiere sal vlaendren hebben, maer sterft hi sonder hoir voor hu, so suldi vlaenderen weder hebben thuwen lijue, ende naer huwe doot sal Guy Vlaenderen hebben, ende Boudin die houdste bastaert sal sijn graue van Henegauwe, ende hi sal Ian sinen broeder voorsien. Ende doen seyde sinte Lodewijc. Ick meene cortelinghe te treckene in Barbaryen yeghen dye vianden gods die sarasijnen ende ongheloouighe Ende ick begheere dat ons neue Willem van Dampyere, ende alle onse leenhouders, ende hy als prinche yeghen die Sarasijnen met mi trecke.