Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe Alexis des Conincx Crysacx broeder, quam voor Andrenoble, met eender groter heercrachte, in spijte hebbende dat Boudin die graue keyser gecoren was.

ALexis des conincx crysacx broedere, groten spijt hebbende dat die van Constantinoble eenen vreimden man Keyser ghemaect hadden hy badt den coninc Iehan van Balacke om hulpe ende bystandichede, om den keyser Boudin te veriaghene. Ende die coninc van Balacken ende Alexis voorseyde, quamen met eenen groten heercrachte voor Andrenoble, ende die van andrenoble ghinghen met eender groter menichte van volcke huyte yeghen Alexis, ende den coninck van balacke. Daer was seer gheuochten, ende daer bleef aen beeden siden veel volcx verslegen, ende dye coninc van Balacke beleyde Andrenoble. Dye keyser Boudin verhorende dat Andrenoble beleydt was met eene grote menichte van Griecken ende van sinen volcke, track metter macht voor Andrenoble. Daer was horrybelijcke

[fol. xxxvij.r]

seer gheuochten, ende daer bleef veil volc aen beyden siden versleghen. Ende men wiste noeyt properlijc waer dat die goede keyser Boudin beuoer, weder dat hi daer inden wijch doot bleef, of en dede, weder dat hy vloodt of was gheuanghen. Eeneghe segghen dat hy vanden coninc van Balacke gheuanghen was, ende dat hi den plouch track in Ermenyen, ende hendelicken stal hy hem van danen, ende wierdt thermyte. Die griecken ende die van Constantinoble segghen ende meenen voorwaer dat hi bleef inden wijch voor Andrenoble. Ende daeromme ghinghen si te rade omme te kiesene eenen anderen keyser, ende sy coren ghemeenlicken ende eendrachtelicken Heyndrick die graue van Aniau, des voorseyde Boudins broedere Keyser te sine van Constantinoble, ende Coninc van Griecken. Ende sommege willen seggen dat Boudin den plouch trac in Ermenien, als voorseyde es wel.vij.iaer lanc, Ende vp eenen tijt so quamen Oosterlinghen cooplieden, die wilden sijn in Damasco, en saghen den Keyser trecken den plouch, ende die keyser hoordese duytsch spreken, ende hi groetese ende si vraechden hem wiehi was, ende hi vertrac hemlieden al sijne gheuaernisse, ende auentuere die hem gheuallen was. Ende die oosterlingen deden so met den Soldaen van Damasco, dat si den voorseyde Boudin verlosten, ende die Keyser Boudin track metten voorseyde cooplieden tot Kuelen. Ende als hi te kuelen quam, so screef hi eenen brief aen Iehanne sijnder dochtere, die doe graefnede van Vlaendren was, ende hadde te manne Ferrant des conincx sone van poortegale. Die keyser Boudin ontboodt dat hi soude sijn binnen.xiiij.daghen te Rijssele, ende datmen hem soude van cleederen voorsien naer sinen state, ende datmen soude maken financhie van sinen rentsoene, omme die cooplieden te betalene, die hem verlost hadden. Vrauwe Iehanne den brief ontfanghen hebbende, toochdene Ferrant hueren man. Ende Ferrant beual, als hi quame, datmen hem heymelic wel ontfanghen soude, ende seyde voort, dat hy spreken soude den coninck van Inghelant om financhie te hebben van sinen rentsoene, want Ferrant en was maer nieuwelincx ghehuwet, ende Ferrant was ghesworen man metten keyser Otto, ende metten Coninc van Inghelant yeghen den coninc van Vranckerijcke. Ende Ferrant beual drie van sine principael raetslieden, dye te Rijssele waren dat sine metten eersten daghe vromelic ende eerlicke festieren souden, ende hem weere wellecommen, ende des anderdaechs, als hy te bedde gaen soude, datmen dan den goede Boudin nemen soude, ende leeden hem een halue mijle buten Rijssele in eenen busch, daer nv staet dye Abdye van markette, ende datmen daer hanghen soude aen eenen boom, twelck alsoe ghedaen was. Die spieghel hystoriael seyt, dat in Vlaendren quam een bedrieger, seggende dat hy was die keyser Boudin, ende was heymelic ouer ghedaen, naer dat die wijch voor andrenoble gheschiet was, ende was int iaer ons heren. Anno.xij^c.ende v.Maer men seyde te Constantinoble, dat die Keyser Boudin inden wijch versleghen was. Ende aldus was heyndric die.G.van Aniau skeysers Boudin broeder keyser ghecoren, die ontrent drie iaer keyser was.