Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hier wonnen die van Biervlyet, met vromigheyt, dat si die wapene van Constantinoble voeren.

Die van biervliet huut Vlaendren waren die ghene die desen torre eerst beclommen ende wonnen, ende staken bouen ten torre hute dye Vlaemsche bannyeren ende daelden nedere ten steeghere, ende deden opene die latijnsche poorte, die fransoysen, ingelschen, spaengiaerden, ende Hongherschen quamen al ter steden inne met groter druust, ende al dat yeghens hemlieden quam, om weere te byeden dat slouch men doot, dit vernam Alexis des keysers Crysacx broedere, die welcke beual datmen tvyer inde schepen steken soude, ende datmen dat pallays wel verwaren soude, ende also die marct, si souden gaen verwaren die mueren. Die graue Boudin siende dat tvier in die schepen ghesteken was, die vlaminghen ende sonderlinghe die van bierulyet namen doen die scepen aldaer tvyer inne was, ende dedense drijuen metter vloet tot aent pyereky, daer die Ieuden woonden, twelcke was die voorburcht vander stede, ende aldaer waren vele goeder herbergen, het was dye principale voorburcht van Constantinoble, ende van desen viere ontstaken dye huysen, ende dat schoone voorburch van pyereky verbarrende metdallen. Het volc dat van alexis weghen ghestelt was, omme die marckt te bewarene, liepen omme tvier te blusschene te Pyereky, maer die graue boudin liet ende abandonneirde sijn scepen, ende ginc met machte naer die marct, die welcke hi wan. Alexis vernemende dat

[fol. xxxvi.r]

Boudin die marct ghewonnen hadde, ende ooc die die mueren te bewarene hadden, lieten die mueren, ende quamen ten pallayse, so dat si bi Alexis vergaderden int pallays, bet dan.vi^m.mannen, ende si ghinghen met machte naer die marckt, omme die weder te winnene Dit siende die vlaminghen metsgaders den duytschen datter quamen een grote menichte van griecken naer die marct, ghingender tegen, ende schuerden dye battaelie vanden griecken, so datter bet dan.iiij^m.doot gheslegen waren. Ende Alexis is siende datter so vele van sinen volcke versleghen was, hi nam die vlucht huut constantinoble, ende trac naer armenyen tot den coninc.van balacken, ende Boudin ghecreech dat pallays, daer hi in vant eenen onnoemelicken schat, ende yuweelen die den seluen Alexis toe behoorden. Boudin aldus gheweldich sijnde vanden pallayse, ende vander gheheelder stadt, ende midts dat alexis gheuloden was, so ontboodt hy den keyser Crysac ende der Keyserinne, met haer lieder sone, van.xix.iaren, ende steldese weder int pallays, in huerlieder maiesteyt, ende dye Keysere Crysack midts dat hy blent was, ende siec, ende seer cranck, so badt hi Boudin van mons, medtsgaders dat sijn sone noch ionck was, dat hem soude ghelieuen regent te sine van Constantinoble, ende te vermakene die officien in griecken. Ende Boudin bleef aldaer.vij.maenden regierende die stadt van Constantinoble, ter bede van den keyser, tot dat die keyser Crysac starf, die welcke aldaer in sinte Sophien kercke met groter eeren ende weerdicheyt begrauen was. Ende Boudin gaf die keyserlicke croone den ionghen Alexis, des keysers Crysacx sone van.xix.iaren houdt, ende ordonneerde vanden tamelicsten poorters van Constantinoble, omme den ionghen keyser te bestierne. Maer wat gheschiede corts daer naer, Mortiflex die here van Thebeyn verhorende die doot vanden keyser Crysack, ende dat den ionghen Alexis sijn sone Keyser was, hy ordonneerde die lieden die bi nachte, den ionghen Keyser verworghen souden, ende hi reedt in griecken al weder roupen dat die Graue Boudin van mons ghedaen ende gheordonneirt hadde, in offiecien ende anderen saken, ende hi maecte sine maghen ende knapen officiers in griecken lant. Binnen deser tijt Boudin van mons merckende dat hy lange tijt te Constantinoble gheweest hadde, ende niet varre en was van Ihrl'm, ende vele van sinen volcke, ende sonderlinge die Inghelschen wilden te haren lande trecken, hi nam ende maecte sine vaerdt naer Ihrl'm, ende ontrent vier dachvaerden van Constantynoble gheuaren sijnde, so hebben.ij.vanden ioncxsten camerlinghen den ionghen keyser Alexis bi nachte verworcht met eender dwale, ende Mortiflex, als quansuys commende in die stadt van constantinoble, dede seer heerlicke den ionghen keyser begrauen bi sinen vader Crysac inde grote kercke van sinte Sophie, ende nam die keyserlicke crone themwaert, ende ontboot die griecken ende die nieuwe officiers die hy gemaect hadde, ende si koren hem teenen keysere Ende binnen desen tijden so was Alexis des conincx crysacx broeder te andrenoble, alwast dat hi sinen broedere dien schimp ghedaen had, hi en schaemde hem nyet, maer horende vander doot van den ionghen keysere, hi quam te Constantinoble, ende begeerde als bi naerhede van sijns broeders weghe, te aenveerdene die Keyserlicke croone, ende die te besittene, groot iammere ende grooten twist was binnen Constantinoble tusschen Mortiflex ende alexis, des keysers crysacx broedere. Daer was seer gheuochten ende grote bloetstortinghe daer omme in constantinoble, ende die principaelste ende heerlicste van constantinoble, reden bi dagen ende bi nachte tot dat si quamen bi den G.Boudin, ende vertrocken hem alle die auentueren van tgene datter ghesciet was, ende si baden hem vriendelijc dat hem soude ghelieuen weder om te keerene tot constantinoble met sinen volcke, ende Boudin met sinen volcke weder omme commende te Constantinoble, Mortiflex die besoengierde vast om keyser te sine, maer die griecken wederstonden hem, ende alexis Crysacx broeder ooc in sijnder ghelijcke, ende alexis die vloot als hi hoorde dat Boudin weder keerde, want die van constantinoble en wilden hem gheen keyser maken, omme dat hi sinen broeder dien schimp ghedaen hadde. Item men vind die.ij.camerlinghen vanden iongen keyser alexis, ende si leden, ende bekenden, dat mortiflex aen hem lieden ghescreuen hadde om den ionghen keyser te verworghene. Die van Constantinoble holpen vanghen alle die nyeuwe

[fol. xxxvi.v]

officiers die hi in Griecken ghestelt hadde, ende Mortiflex siende datmen sine officiers vijnck, so vloodt hi wt Constantinoble als voorseyde es. Ende die.G.Boudin ghecreech skeysers pallays, ende die griecken vloden alte met, Ende die van Constantinoble ghinghen al te gadere te rade, om te kyesen eenen keyser, Alle flatterie of smeekende fraude, bedroch, iontste, of maleficien gheweerdt van houden tijden wast so gheordonneert, dat die patriarcken van Ihrl'm ende die Bisschop van bethleem, ende die van Spaeus weghe van ouer zee, hadden vulle auctoriteyt ende macht metsgaders die bisscoppen van dien lande, te weten van Ephesien, van Tiacyra, van Armenia ende die griecken sonderlinghe vanden lande, ende twee of drie vanden notabelsten poorters vander stadt van Constantinoble, dese voornoemde personen vermochten te kyesene eenen keyser, ende waren daer ooc eeneghe vreimde bisscoppen bi auentueren commen pelgrimsche wijse, men mochtse ooc admitteren ter electie ende daer omme die bisscoppen van Troyen, Soyson, van Theerenburch, van Halusdate, ende die Abdt van Akers, souden eerst bedijnghen spreken om die gracie van den heleghen gheest te verweruene, ende danne souden si te rade gaen om eenen Keyser te kyesene ende te noemene,

daer waren ooc daer toe gedaen commen twee vanden notabelsten poorters vander stadt van constantinoble, sonder eeneghe alteracie, ende vele raets te houdene eendrachtelick sy coren ende namen Boudin den graue van Vlaendren ende van Henegauwen keyser van Constantinoble te sine, ende coninc van Griecken, Anno domini.M.ij^c.ende twee vp den sondach daer naer alsmen singt inder missen dat introit Iubilate deo. Ende vp den derden sondach naer paesschen, doe was hi biden consente vanden ghemeenen volcke van constantinoble ghecroont, Maria sijn wijf de edele vrauwe ende hooge van geboorten, liet Iehanne huer oudtste dochtere, inder hoede vanden coninc van vrancrijcke Phelips hueren swacelijnc, ende voer te Constantinoble waert totten keyser haren man, maer om die grote vreese vander zee, ende om diueersche tempeesten so quam si inde hauene van suryen, seere siec ende cranc inder stadt van Acharon, ende bleef daer quelende een luttel tijdts tot dat sy starf, ende ouerleedt int iaer xij^c.ende viere.