Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Boudin van Mons, den.xix.Graue, die welcke wart coninc van Griecken ende Keyser van Constantinoble, ende bleef naemaels versleghen in Turckyen.

¶ Dat.xxv.Capittel.

BOudin van mons die daer naer coninck was van Griecken, ende Keyser van Constantinoble, hy was die.xix.Graue van Vlaendren. Het gheuiel int iaer.M.ende.ij^c.dat die coninc Phelips eene groote feeste hilt inde kersdaghen, ende ontboot bi hem alle sine edele Ende daer waren te diere feeste van vele van den heeren, diueersche beloften belooft. Ende daer was ter maeltijt eenen paeu ghereedt

[fol. xxxv.r]

Ende die graue Boudin horende vele van diuerschen beloften, ghedaen byden heeren daer yegenwoordich, beloefde daer gode ende dien paeu, dat hi nemmermeer wapen aen doen en soude yeghen dye kerstenen, maer vp die ongelouege heydenen ende vianden gods, die sinen oom phelips van elsaten ghequetst ende ghedoot hadden, ende sijnen houden oom den coninc van Ihrl'm vermoort, ende dat hi te Iherusalem trecken soude. Dit horende vele biscoppen ende andere weerlicke heren, si beloefden, in dien si consent vanden coninc ghecrijghen consten, met hem te treckene te Ihrl'm, twelck hemlieden die coninc consenteirde. Daer beloefden vele edele mannen van gheboorten ende princhen dat si inder ghelijcke gheen wapenen aen doen en souden, dan yeghen die sarasijnen. Ende alle die ghene die mede trecken souden, beloefden binnen.iij.maenden bereedt te sijne, ende koren daer den graue Boudin voor haren Amirael, ende om huerlieder leedtsman te sine. Ende dat segghen was, so wie hem volgen wilde, dat si hem vinden souden int heynde vanden Maerte te Venegien. Ende sonderlinghe alle dye hier naer gheschreuen staen, beloefden mede te treckene, ende lijf ende goedt te auentuerene, yegen dye sarasijnen voor dat kersten geloue. Eerst Heindric.G.van aniau graue Boudins broedere, Lodewijc graue van bloys, Marquis van monferraert, Thybault sconincx phelips van spaengnen broedere, die graue van persen, die graue van saint pol, dye graue Symon van monfoort ende sijn broeder, die graue Buyot, merian van nielle, Inghelram graue van buenen met sinen drie broeders, Reynout van dampiere Paeyenus van orlyens, Boudin van bailleur, Pieter van barselles, viere duytsche bisschoppen, die bisschop van soyson, die bisscop van terenburch, die bisscop van tours, Pieter brachels, Boudwijn van beaurenoyr. Item noch grote menichte van volcke, als fransoysen, inghelschen, ende spaengiaerden, ende vlamingen vonden hem ten beteekenden dage te Venegien, omme mede naer Iherusalem te varene. Dese reyse ende vpstel vernemende den grooten salladijn van suryen, dat dye kerstenen met sulcker mach vp reyse waren, omme te commene naer Ihrl'm, hi sandt den prinche van Venegien duysent marc van sijnen goude, ende bouen dien, so beloefde hi dat die Veneidcianen souden moghen varen ende trecken deur al Egypten lancx en dweers, deur al Damasco, ende Arabyen, anthiocien, ende alle Suryen deure, vp datmen Boudin van mons, noch nyement van sinen gheselschepe, gheene schepen leenen noch verhueren en soude, ende datmen hemlieden riede weder thusewaert te keerene. Die hertoghe van Venegien verboot op thooft dat niement soe coene ware eenich volck van wapenen ouer te voeren na Ihrl'm, Boudin van mons siende dat men te vergheifs lach te venegien, hi riet datmen trecken soude te Geneuen. Dit vernemende die hertoghe van Venegien, hie seyde hemlieden al biddende. Och edele heeren van Vranckerijcke, in Griecken is die stadt Gazara die die kersten cooplieden daghelicx groot grief doet, het waer salegher ende van meerder verdiente, die roouers ende moordenaers te ghecrijghene, ende die te destrueirne, dan te Ihrl'm, met vreesen vanden heydenen te treckene, wilt die voorseyde stadt die ons toebehoort dwingen, wi sullen v voorsien van schepen sonder huwen cost, ende Gazara ghecreghen, wilt dan voordt beuechten die quade Griecken, die seere quade kerstenen sijn. Dit vernam die graue Boudin ende sijn gheselscap, die seer blijde waren, ende si ghinghen te schepe, ende voeren te Gazara, die vyant ende rebel waren den veneidcianen, ende si ghecreghen die stadt binnen.xiiij.daghen met foortsten, ende roofden dye stadt, ende maectense subiect ende onderdanich den prinche van Venegien. Binnen deser tijt soe quam die nieumare, dat die Keyser Crysac van Constantinoble, beede sine oghen huyte ghesteken waren in een clooster van vrauwen, ende sijn broeder Alexis die hadde dat ghedaen doen, want hi begeerde selue keyser te sijne, ende te vsurperen dye Keyserlicke croone, ende hy veriaechde den keyser Crysac huyt Constantinoble. Des keysers Crysacx wijf ontboot haren broeder, den coninc van Hongherien dat hi haer wilde helpen wreken dye schade ende schande die haren here den Keyser, haren man ghedaen was, ende helpen dat haer sone die alexis hiet, die ontrent.xix.iaren houdt was, dat hi mochte in die stede van sinen vader Keyser ghecroont sijn. Die coninck van Hon-

[fol. xxxv.v]

gherien quam te Gazara, ende badt Boudin van mons dat hi hem wilde bijstandicheyt doen met alle den Fransoysen om den broedere Alexis vander keyserlicheyt te helpen veriaghene, ende den keyser Crysac metsgaders sinen ionghen sone weder te stellene in sine Keyserlicke maiesteyt. Die coninc van Hongherien gaf Boudin dat last, ende men dede sine schepen voorsien van vytaelien ende van ghescotte, ende van geleytsmannen die hem lieden beweghen souden. Ende die fransoysen commende voor Constantinoble by nachte, ende met groter cracht ghinc boudin van mons van stonden aen, metsgaders den Vlaminghen ende beclommen dat galatas, twelc was eenen groten torre staendevp die hauene.