Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
¶ Dat.xxiiij.Capittel.![]() BOudin van Henegauwe dye wort graue van Vlaendren, als van sijns wijfs weghe vrauwe margriete, die dochtere van Diederic van elsaten, ende sustere vanden voornoemden Phelips van elsaten, ende ooc dochtere van der heleger vrauwe Sybelye des conincx dochter van Ihrl'm, ende naer die doot van hueren vader, so was haer broeder coninc van Iherusalem. Ende sijn moeder Sybelye woonde bet dan xij.iaren in een clooster van nonnen, dye hospitael susteren waren, ende diende daer die siecken ende aerme lieden ende pelgryms in sint Ians hospitael, datmen heet Lazarus huys, dye welcke gaf Diederic haren man dat helege bloet, dat nv te Brugge rust in s.Baselis kercke. Dye coninc Phelips van Vranckerijcke, dye welcke te wijue hadde ghehadt des voorseyde Boudins van Henegauwe dochtere, die welcke starf binnen der tijt dat haer man die coninc voor Akers was in Suryen. Desen voorseyde coninc van Vranckerijcke commen sijnde van ouerzee, in dye kerstdaghen, daer naer hilt eene grote feeste, ende ontboot alle sine edele ter voorseyde feeste, daer ontboodt die coninc ooc Boudin van Henegauwe sinen sweer, die welcke vader was vander coninginne, des conincx Phelips wijue, die welcke binnen dyen iaren ouerleden was. Die coninc sprac sine edele blijdelic toe, ende ontfincse seere minlicken, sonder alleen Boudin van henegauwe, die en sprack hi niet toe, maer keerde sijn hooft onweerdelick van hem, ende besach hem als of hi gram vp hem gheweest hadde. Doen peynsde Boudin hoe dat hi in voorleden tijden, als die coninc ende die.G.phelips oorlooghden yeghens malcanderen, datmen meer ghehelt was met ionsten tot den.G.phelips dan tot den coninc die sine dochtere had te wijue, ende peynsde of hy dat nv vp hem soude willen wreken. Ende aldus die.G.Boudin merckende dye onweerde vanden coninc te hemwaerts, hi stal hem seluen al heymelic huyt des conincx Pallays, sonder oerlof te nemene, ende quam te vlaendre waert. Ende die.G.Boudin perplecx wesende, begheerde raet aen die edele van vlaendren ende van Henegauwe, hoe hy den coninck payen soude om tot sijnder vrientscap te commen. Inden raet was ghesloten dat | |
[Folio xxxiiij.v]
| |
die Abt Daneel van Cameroen, ende den Abt Symoen van Angnencen souden trecken als Ambassadeurs ende als middelaers, ende gaen spreken den Coninc ende den Bisschop van Ryemen die des conincx recht hadde te bewarene. Ende daer wast so soetelick ghepreponeirt vanden Abdt van Cameroen dat die coninc, ende al sinen edelen raedt daer inne ghepaeyt waren, doen was daer verhaelt, die belofte van den graue Phelips als hy sine nichte svoorseyde graue boudins dochtre gaf in huwelicke, dat naer sine doodt west vlaendren soude toecommen Lodewijcke den sone vander Coninghinne sijnder nichte. Ende die eerdtsbisscop Willem van Reyemen ende die bisscop Pieter van Atrecht quamen in Henegauwe ende maecten den paeys tusschen den coninc van Vranckerijcke, ende Boudin van henegauwe, dies so soude boudin eeuwelicke laten westvlaendren, twelc besitten soude Lodewijc des conincx houdtste sone ende sine naercommers, dats te wetene Bapamen, Atrecht, Hesdijn, Leus, Bolloegnen ende dat graefschip van saint Pol, Guysen ende Lylers. Ende hier inne so consenteirde die graue Boudin van Henegauwe. Ende hiermede so wast Pays tusschen den coninc, ende den graue boudijn voorseyde. Ende die graue boudin trac metten voorseyde bisschoppen dye desen paeys ghemaect hadden naer parijs ende dede den coninc manschip van oostvlaendren. Dese boudin hadde twee sonen bi margrieten sinen wijue, als Boudin van mons, een edel ende vroom prinche, die naerderhandt al Grieckenlandt bedwanc ende was te Constantynoble ende wordt daer Keyser, dander sone hiet Heynric, ende was Graue van Aenyau, ende naer sijns broeders doodt wardt oock Keyser van Consantinoble, ende van Andere noble, dese Heynrick hadde twee dochteren, deene was Abdesse te meessene, dander gheheeten Elisabeth, was coninghinne van Vranckerijcke, ende was sinte Lodewijcx groote vrauwe. Ende als Boudin vlaendren gheregiert hadde in grooten payse ontrent vier iaren tijds, doen starf die graefnede margriete sijn wijf, die welcke licht begrauen te sint Donaes te brugge inden choor, aen die Noordtsyde also men gaet naer die sanctuarye, ende dat graefscip van vlaendren quam toe Boudin van mons die dhoudtste sone was, ende hi versach sinen sone te wijue vrau Marye, des grauen heyndricx dochtere, van Champaengnen, die hy hadde bi des conincx Lodewijcx des goedertieren dochtere. Ende Boudin van Henegauwe hilt dat graefschap van Henegauwe, ende Boudin van henegauwe, naer dye doot van sinen wijue leifde ontrent onderhalf iaer, ende hy was begrauen te Haens in Vermandoys. |
|