Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Phelips van Elsaten, Diedericx sone, dye welcke die wapene vanden swarten leeu wan in Turckyen.

Dat.xxiij.capittel.

PHelips van Elsaten Diedericx ende sinte Sybelyen anderde sone, van wyen datmen leist, dat hi vp den derden dach van sijnder gheboorte, riep ende sprac seer luyde. Euacuate domum, dats te seggene, ydelt dat huys. Dese Phelips naer die doot van [si]nen vadre, gouuerneirde Vlaendren soe wel, ende so wijselick, ende so gherechtelicken, dat hi allen princhen, die doe waren weerdich was, in eeren voren ghestelt te sijne, want alle verraderye, moordaden, dieften, vloucken ende sweeren, wederstont hy ende brochte dat of, al Vlaendren duere. Hi en regierde niet Vlaendren alleene in sulcker wijs, maer oock alle die landen ontrent Vlaendren gheleghen, waren verbetert midts sinen exemple. Item die Fransche Coninc Lodewijck, dye goedertieren, gaf hem om sijnder duecht wille te wijue eene eenghe dochtre, vanden graue Vermandoys, gheheeten Radulphus, wyens name was Elizabeth, ende was des conincx na nichte, ende gaffer mede dat Graefschip van Vermandoys, ende alle die steden ende sloten daer toe behoorende. Dit benijde die graue Floreins van Hollandt, want hy hadse selue gheerne ghehadt. Ende daer omme met eenen vreemden occusoene, ontseyde hi Phelips van Elsaten, om dat sijn schoonheere Robrecht die Vriese, wan bi foortsen tlant van Walcheren, ende hy begheerde Walcheren weder te hebbene, of hy soude hem also vele landts of winnen. Phelips van Elsaten antwoorde dat dye patrimonye die hem van sinen vadre verstoruen was, dat hi die soude houden ende beschermen met den sweerde Dese graue Floreins nam met hem den Hertoghe van Cleue, vanden Berghe, ende van Ghelre, wel met.xij.duysent mannen, van wapenen sterck, ende trocken int Graefschip van Elsaten barnen, blaken, ende roouen, ende laghen voor Aermestein. Die heren van Elsaten verwonderende, ontboden dit den graue Phelips, dat hy haestelicken commen soude, om hemlieden te sercoursene, of si souden hemlieden moeten ouer gheuen. Phelips van Elsaten ontboot sinen broeder Mattheus den graue van Beunen, met alle die macht van Pycaerdyen, Henegauwe, Aertoys, ende Vlaendren, ende Ardanen, so dat si waren wel vijfthien duysent mannen sterck, ende quamen voor Aermesteyn.