Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Hoe die graue Diederic den Coninc.van Vranckerijcke manscip dede van Vlaendren]

¶ Hoe die graue Diederic den Coninc.van Vranckerijcke manscip dede van Vlaendren, ende hoe si tsamen te Ihrl'm reysden, om die tontsetten.

[fol. xxiiij.r]

ENde die graue Diederic vernam als dat die coninc van Vranckerijcke sinen neue derwaert trat, hi volghde den coninc ende dede hem manschip vanden Graefschepe van Vlaendren. Ende hy ghecreech des conincx vriendtscap. Ende voor Iherusalem commende die voorseyde Diederic, hadde hem ghelijck eenen leeuwe onder die Sarasynen, bouen alle kerstene Princhen die daer waren, hy sloucher vele doodt, ende hy vijncker vele, daer was eenen stranghen wijch gheuochten daer bleuen luttel kerstenen doodt, maer vele Sarasynen ende Agarynen bedt dan hondert en twintich duysent, ende daer worden drie coninghen gheuanghen. En was daer also begaen byder gracien gods, so dat dye stadt van Iherusalem was beschermt. Ende die coninc Fulco van Iherusalem verhoorde van Diederick van Elsaten, dat hy hem so vromelic ghehadt hadde in dien strijt, (hy haddene ooc wijlen eer gesien in Egipten) ende daer omme so gaf hi Diederic sine dochter Sybilla tot eenen wijue, bijder welcker Sybilla hi hadde viere cnapelicke kijnderen. Boudin dye ionck staerf, ende Phelips die daer naer Graue was van Vlaendren Artoys, ende Vermandoys, ende Mattheus die Graue was van Beunen, ende Pietre die Canonic was te Camerijcke, ende ghecoren Bisschop van Camerijcke daer naer. Ende hi hadder ooc bi twee dochteren, Margriete dye te manne hadde den Graue Boudin van Henegauwe, ende Gheertruudt die Nonne was te Meessene. Diederic als hi Vlaendren gheregiert hadde paysyuelic ende eerlic sijn wijf sconincx dochtre van Iherusalem badt haren man by daghe ende by nachte, dat si mocht reysen te Iherusalem, vysenteren huere broeders, dye welcke doe hadden dat regement vanden heleghen lande, ende dat si mochte vysenteren die heleghe plaetsen, daer Iesus christus begrauen was, ende daer hy ten hemel voer. Ende die graue Diederic, midts tlanghe bidden, consenteerdet haer, al dede hijt node. Ende dede haer maken alle ghereetschepe, omme te Iherusalem te varene, ende ordonneerde haer goet gheselschap van edele mannen ende vrauwen dye haer souden gheleeden ende verwaren.

[fol. xxiiij.v]

Ende so commende te Iherusalem visenteirde met deuocien Christus graf, ende oock andre heleghe plaetsen, eer datse quam tot den coninck haren broedre, doe beloofde si gode vp dat heleghe graf datse soude leuen in continencie ende soude sijn dienareghe vanden aermen in sinte Lasarus hospytael, hare belofte ende pelgrimaedtge ghedaen, ghinc tot den coninc haren broedre, daer si met groter blijschap ontfanghen was, ende eer datse daer adt of dranc, so begheerde sy te siene tgraf van huer vadere en moedre, doende daer deuotelick huer ghebet ouer huer lieder sielen, dat gedaen sijnde, so seyde si tot den coninc haren broeder. Ic hebbe oerlof ghenomen aen Diederic mijnen man, ick hebbe hem.vi.kijnderen ghedreghen daerer vijf of leift, ende een esser doodt. Ende ic beloofdet gode den heleghen Graue eeuwelic te dienene, ende binnen sint Ians hospytael den siecken en den aermen, ende daer willick sustre worden. Ende dyt hospitael was thuys daer Lazarus woonde, die onsen heere Ihesus vander doot verweckte. Ende die coninck haer broeder dit hoorende hi en wilde hare goede deuocie niet beletten, hi deidtse sustre cleeden int hospytael. Ende si diende die siecken van aldies hemlieden van nooden was, sy vastede ghetijdelicke, den aermen siecken legghende ende verlegghende, altijdts in bedijnghen, lettel of niet slapende, in deser manieren was si dienende den vppersten coninc Ihesus van nazareene, Ende haer leedtslieden waren wel van huer betaelt, ende screef den graue Diederic ouere, hoe dat si sustre was in sint lazarus huys. Ende dese heleghe vrauwe Sybilla, sandt Diederic hueren man dat weerde heleghe bloedt van Iherusalem te Brugghe, het welcke bloedt was vander wasschinghe ende suueringe vanden lichame ons liefs heeren, als hi doot vanden cruyce ghedaen was, het welcke bloet Diederick ontfinck met groter weerdicheyt ende deuocien, ende hi dede maken inden burch te Brugghe sinte Baselis kercke, ende stichtede daer vier prouenden, ende eene halue, om vier cappelanen ende eenen costre, daer daghelijcx te singhene die.vij.ghetijden. Ende daer gaf hi dat heleghe bloedt, datmen noch iaerlijcx omme draecht vp den derden dach van Meye. Diederic dede bi edele pelgrymmen ondersoucken den staet vander weerdegher vrauwen Sibilla sinen wijue, ende als si huerlider pilgrimaedtge ghedaen hadden, so ondersochten si den staet vander helegher vrauwen Sibilla, ende ginghen in Lazarus huys, daerse sustre was, daer si minlick van huer ontfanghen waren, ende huer groetenesse dragende van sgrauen Diedericx wege. Ende si sandt haren here haren man eene beslotene lettere, dye si den graue Diederic gauen, als si in Vlaendre quamen. Ende die pelgryms seyden hem den lof ende duecht, diemen van haer seyde ouer al dye stede van Iherusalem, ende in alle die landen daer ontrent men seyde huer wesende ghenouch een helege santinne. Sy en adt gheen vleesch, selden dranc si wijn, si vastede meestendeel alle daghe, ende drouch haren hemden, ende en dede in tvoorseyde godshuys, niet dan tvuylste werc, ootmoedelicke ende minlic dienende die aerme siecken, ende verlegghende. Als dye pelgryms dit gheseyt hadden tot den graue, so wort hi ouerdinckende, hoe dat sijn neue Willem van Loo die blent gheworden was, hadde achter ghelaten sijn Graefschip in Inghelant, ende dat Burchgraefschip van Ypre, ende dede maken een cloostre te Loo, van monicken reguliers, daer hy alle daghe hoorde die.vij.ghetijden, ende deelde den aermen minlic sine aelmoesene. Dese Graue Diederic nam exemple aen sinen neue, ende aen sijns selfs wijf, ende wilde hem voughen huyten gheschalle vander weerelt, ende trac ghetijdelic inden busch van Watene. Ende daer dede hy vp den berch stichten een clooster van canonicken reguliers, ende aldaer hoorde hi daghelicx den lof gods, ende die.vij.ghetijden. Ondertijden reedt hi te Loo, visenterende tgraf van heer Willem van Loo, sinen neue, biddende ouer sijn siele, ende onderwijlen te Cassele, sinte Peeters onder den choor inden crocht, ten graue van Robrecht die vryese dhoude, die sijn groothere was, onderwijlen voer hy oock te sinte Omaers, in een scheipkin te sinte bertins ten Graue van Boudin Apkin sijn rechtsweer, ende van Boudin die simple sinen oom, die welcke van sinen scoonheere voor Cassele

[fol. xxv.r]

versleghen was, ende bi wijlen te borborch int cloostre, tot sijnder moeye Clemencie dye Graefnede. Ende vp eenen tijt was hi te Borborch, ende daer quamen hem dye cortsen aen, ende haestelicken was hi begheerende, al sine Sacramenten, ende corts daer naer starf hi, vp den Nieudach. Int iaer ons heeren.xi^c.ende.lxvi., als hi.xlij.iaer graue gheweest hadde, ende tlant gheregiert in groten payse, ende was gheuoert te Watene, in die Canesye, ende aldaer begrauen, welcke canesye hy aldaer dede stichten ende fonderen.