Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Van Willem van Normandyen, sgrauen sone vam Normandyen.die.xv.Graue van Vlaendren

¶ Dat.xxi.Capittel.

[fol. xxij.v]

WIllem van Normandien sgrauen sone van Normandyen swacelinc vanden groten Coninck Lodewijck van Vranckerijcke. Dese Willem was dat Graefscip van Vlaendren ghegeuen vanden Coninck van Vranckerijcke met groten onrechte. Dese voorseyde Willem van Normandyen wort een groot vertasseerdere. Ende hy dede vele ouerlasts den volcke in pointijnghen, in settijnghen, in maeltoten, ende in dobbel toolnen, hi vercochte die officien, waer omme hy van al tvolc vanden lande wordt ghehaet. In Vlaendren quam een ionghelinck hiet Aernoudt, ende hi was sone van Kaerle Kamuts sustre, ende hi begheerde dat Graefschap dat Kaerle sijn oom beseten hadde, ende was dat rechte oyr ende naeste bloedt om met rechte Vlaendren te besittene, ende hy quam eerst tsint Omaers, daer hi weerdichlijc ontfanghen was. Willem van Normandyen dede der stede van sinte Omaers so groten ouerlast dat si nemen een bestand van.xl.daghen omme den iongelinc te beradene, dat hi ghesont weder trake in Noorweghe. Item Willem van Loo quam ten Damme met vele schepen vul yngelsche saudeniers die in vlaendren alte grote schade deden, ende si myneteden al te seere tvolc van Willem van Normandyen, twelcke waren al Fransche saudeniers. Willem van Loo stichtede brandt in vele steden in Vlaendren. Dien van Ghendt van Brugghe, ende van Ypre hadden hem gheerne ghehadt ouer Graue, ende veriaecht den Norman, mer si en dorstent niet doen omme dat hi manschap hadde gedaen den coninc van Inghelant. Dit vernam Lodewijck coninck van Vranckerijcke, hoe dat die Inghelschen Vlaendren silgierden. Hy sandt Willem van Normandyen.x^m.lieden van wapenen, die welcke veriaechden dye Inghelschen. Ende die ionghe Aernoudt hoorende tiammer dat in Vlaendre was, hi badt Willem van Normandyen dat hem ghelieuen wilde, hem te doen gheleedene te sinen lande van Noorweghe, ende hi schalt quijte al sijn recht, dat hy aen Tgraefschip van Vlaendren hadde, doe ende tallen tijden. Ende Willem van Normandyen gaf hem grooten ghiften, ende dedene eerlicke gheleeden te sinen lande. Die x^m. saudeniers bleuen in Vlaendren metten graue Willem, ende vercrachteden der mannen wijfs, ende laghender bi yeghens der mannen danc, ende als sijer yeghen seyden ende huer lieder wijfs wilden weder nemen, so slouch mense doodt. Ende die Graue Willem dede der gelijcke, als poorters wijfs, ende maechden te Violeirne. Ende men screef den coninc van Vranckerijcke ouere tgroote grief ende schade dat Vlaendere ghehadt hadde, ende noch hebben soude vanden oors die staen omme Vlaender te besittene. Ende men screef den coninc ooc ouer al tregement vanden Graue ende van sinen dienlijnghen, maer dye Coninck en achte des niet, ende en gaffer niet omme. Dit aensiende die drie steden Ghendt Brugge, ende Ypre, ende al tghemeene landt, dat dye Graue Willem so lancx so aerger waerdt, ende alle sine officiers, si sonden bedectelic eersameghe boden, aen Diederick den Graue van Elsaten, die recht oor was van Vlaendren, ende een edel man van wapenen, ende hadde vele schone fayten van wapenen ghedaen, in Egypten, en Barbaryen, ende in Syrien, dat hi rasschelic hem wilde spoeden om te commene in Vlaendren, want dat graefschip by rechter versteruenesse hem

[fol. xxiij.r]

toe behoorde, ende aen ghecommen was, Ende dat hy met hem soude brijnghen.iiij.of v^m.saudeniers van wapenen, omme eenen tyrandt te verdrijuene dye Vlaendren selgierde, want al die steden van Vlaendren souden hem hulden, ende ouer haren Graue ontfanghen. Diederic dese bootschap ontfaen hebbende stelde ende ordonneerde omme dat Graefschap van Elsaten te doen regierene bi sekere wijse persoonen, ende quam te Vlaenderwaert met.v^m.edele persoonen, ende fijne lieden van wapenen. Ende in Ghendt, Brugghe ende in Ypre commende, wasser eerlic ontfanghen. Dyt verhoorende Willem van Normandye, quam van Rijssele te Cortrijcke, ende men en woudene niet in laten. Vandaer so quam hi te Ghendt, ende daer en dede men hem gheene weerdichede. Hi ontboodt die schepenen by hem te commene, mer si en quamender niet, maer men seyde hem, wilde hi Scepenen spreken, dat hi quame inde schepenen camere. Willem quam int schepen huys, daer so wordt hi so ouerhaelt van sijner ghierichede ende felhede, ende van sijnder bouvachtighede ende onreynichede. Ende si seyden datter was in Vlaender commen een Edel ende notabel man, die welcke gherechtich oyr van vlaendren was, ende si en soudene niet veriaghen, al wast dat willem van Loo ende Aernoudt van Denemercken veriaecht waren. Ende wildij vechten teghen Diederick ende hem veriaghen, wi en sullen hu helpen noch deeren.