¶ Hyer wordt Willem van Normandyen Graue ghemaeckt van Vlaendren, die vijftienste.maer tgheduerde seer onlanghe.
ITem heer Willem van Loo trac byden Coninck van Ingelandt, hem claghende hoe hem die coninck van Vranckerijcke veronghelijct hadde, ende hem sine erue ende versteruenesse ghenomen hadde. Hi was met den Coninc Steuen van Inghelandt in eenen wijch, die hy met sijnder vromicheyt wan, waer omme dye Coninck Steuen gaf hem dat Graefschip van Cans in Inghelandt, daer was hi binae.xxiiij.iaer, ende hi bedyde blendt, ende hi seynde bedecktelijck sijnen schat te Vlaendre waert, ende quam woonen te Loo, in sijne heerschappye. Ende al daer stichtede hy een cloostre van Canonicken Reguliers dye daer die.vij.ghetijden hilden, die hi daer ghetijdelick hoorde met grooter deuocien. Ende als hi ontrent thien iaren blendt gheweest hadde, ende te Loo wonende seere houdt van iaren sijnde, so starf hy vp den.xxv.sten dach in Laumaent, int iaer ons heeren.xi.hondert ende.lxij. Ende Diederick van Elsaten die doe Graue van Vlaendren was dedene begrauen te Loo met groter weerdicheden in tcloostre, twelck hi hadde doen stichten. Ende Diederick plach hem als hi noch leuede, ghetijdelick te vysenteirne naer dat hy blendt was gheworden.
Auteursrechtvrij