Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe Willem van Normandyen beuacht Diederick van Elsaten, die welcke was met sijnre heyr crachte te Acxpoele.

WIllem voorseyde vernam dat Diederic was te Acxpoel, daer trac hy met sinen.x.duysent walen, Daer was seere gheuochten, ende aen beeden siden vele volcx versleghen, dyt ouermerckte Diederic van Elsaten dat sijn volc versleghen ende seere ghemindert was, ende track wech tot in Brabant, omme meer volcx te finierene. Ende hi quam in Haelst om hem.iij.oft vier daghen te rustene, ende om al heymelic die van Gendt bi hem te ontbiedene Ende dit vernam Willem van Normandyen dye hem aldaer quam besoucken met.vi.duysent Fransoysen, want hem waerender

[fol. xxiij.v]

ofghesleghen wel.iiij.duysent inden voorleden strijt van Acxpoele. Ende hi meende die Stede te ghecrijghene, want men wildene daer niet inne laten, daer omme ghinck hi stormen vp die stede. Ende dye Graue Willem stondt voor die poorte vander stede ende sprac beuelende, datmen hem als graue ende prinche vanden Lande sine poorten opene doen soude, twelc men niet doen en wilde. Ende mettien was daer een schotter dye hiet Casin, dye welcke spien eenen cruysboghe en schoot met eenen ghevenijneirden careele naer den Graue Willem, ende gherochtene in sine schoudere seere diepe, so datmene moest wech leeden, van welcker quetsuere hi starf binnen.vij.daghen daer naer. Ende wordt begrauen te sinte Bertins inde voorkercke, bi Boudin Apkin. hi starf vp den.xvi.dach in Ougstmaent, int iaer ons heren.xi^c.ende.lxxix. Hi en rengneirde maer ontrent.xv.maenden oneerbaerlicke ende seere tyrannelicke.