Een devoot ende profitelyck boecxken

[p. 285]

⁺

+ Fo. C.xxviij.^r-Fo. C.xxviij.^v

N^o. CCXLVII.aant.

ℂ Opten voys vande busonnette was dese leysene ghestelt met bliden sinne/ alsoe men singt van coppen minne.

1.
BEdrijft nu vruecht/ bedrijft nu melodie
Bedrijft nu melodie
Loest die maecht ghebenedijt
Die ons allen heeft verblijt
Ghequijt. Wient spijt
Sy heest veruult het woort van prophecie
Gheloeft sidy Marie.
Si heeft verblijt der engelen ierarchie/ der engelen ierarchie
2.
Mids dese schone ionge dracht
Gheboren opten alder coutsten nacht
Bewacht Voerdacht
Albi des vaders cracht
Ghebaert hebdy v kint/ wel schoone suyuerie.
Gheloeft sidy Marie.
3.
Die herdekens opt velt waren seer verblijt/ si waren seer verblijt
Sij songhen/ si spronghen/ sij dansten onueruaert
Si liepen seer blidelijc te bethleem waert.
Vermaert Verclaert
Het was hen gheopenbaert
Dies waren si vry van melancolie
Gheloeft sidy Marie. ||
4.
Besneden wert Iesus gods liefste tresorie/ gods liefste tresorie
Ten achtsten dage vol alder ootmoet
Symeons woerden Maria wel verstoet
Doer dbloet Seer goet
Was tstorten ons behoet
Want het heeft ons behoet voer die helsche partie
Gheloeft sidy Marie
5.
Drie coninghen van groter seignorien/ van groter seignorien
Sochten dit kindeken/ elck wt eenen vreemden hoecke
Si haddent ghelesen in propheten boecke
Tbesoeck Seer cloeck
Deden si sonder vloeck
De clare sterre inden hemel zye
Gheloeft sidy Marie.
6.
Herodes wreet sijnde vol der hatie/ vol der hatie
Die ionghe kinderen wt nide groot
Sijn tyrannen te doden gheboot.
Dies schoot Ende vloot
Maria wt sulcker noot
Vragende Ioseph/ waer yst best dat ic vlie
Gheloeft sidy. &c.
7.
In egipten dat ons die vlucht geschiede/ dat ons die vlucht gheschiede
Een lantman sijn koorne heeft ghesaeyt
By miraculen niet langer ghedelaeyt
Ghepaeyt Verfraeyt
Heeft hi ter stont ghemaeyt
Sulc wonder en geschiede nie
Gheloeft sidy Marie.

[p. 286]

 

⁺

 

8.

 

Princesselike maecht regente der hellen prijs/ regente der hellen prijs

 

Wij bidden v met deuoter zede

 

Kaerle onsen Keyser verleent pays en vrede.

 

Onse stede Daer mede

 

Dit nu is onse bede

 

Beschermen wilt voer verraderie

 

Bidden wij v Marie.

+ Fo. C.xxviij.^v-Fo. C.xxix.^r