Een devoot ende profitelyck boecxken

[p. 284]

⁺

+ Fo. C.xxvij.^v-Fo. C.xxviij.^r S i

N^o. CCXLVI.

❧ Dese leysen gaet op die wise Ick en hebbe gheenen man/ die mi verhuegen can

ℂ Bi hem die scrijft Borse sonder ghelt
Was dese leysen ghestelt

1.
ALder maechdelijcste moeder
Maria gebenedijt
Die baerde onsen behoeder
Dus sijn wij al verblijt
Want God aensach v groot ootmoet
Dus nam hi aen vleesch ende bloet
In v reyn suyuer greyn
Dus payen wi dat kindeken cleyn
Gheboren van eender maghet reyn
Het weent so menighen traen
Het sal ons van sonden dwaen
2.
Wat wonderliker cuere
Dat God nu heeft ghewrocht
Onsterffelijcke natuere
Heeft sterffelicheyt besocht
Thoochste totten nedersten quam
Ende tnederste totten hoochsten clam
Is dit niet vry bestaen
Dus paeyen wi dat kindeken cleyn
Gheboren van een. &c.
3.
Die coninc groot van machte
Die eewich domineert
Onder het ioetsche gheslachte
Is hi ghedescendeert
Ende heeft geleden om ons behout
Honger/ dorst/ heet/ en cout
Ende dicwils moede ghegaen ||
Dus payen wij dat kinde. &c.
4.
Den wech volmaect int wesen
doelt selue eylaes waer hi trect
Die waerheyt hoochste ghelesen
Wort selue bespot beghect
Het leuen dat elc sijn leuen gheeft
En die ons reden ghegeuen heeft
Heeft selue die doot ontfaen.
Dus payen wi dat kinde. &c.
5.
Die stercste man van leden
Is gheworden een teeder kijnt
Die gheuer is van vreden
Hi weent alsoot wel schijnt
Eylacy eer verdriet ghenaect
Den pays ware goet ghemaect
Wij hebben alle misdaen
Dus payen wi dat kindeken. &c.
6.
Princesse Maria reyne
Wel alder suyuerste maecht.
Bidt doch v kindeken cleyne
Dat hi ons niet en plaecht
Want al is sijn ontsermen groot
Wij leggen thooft in uwen scoot
Eer ons die sonden slaen
Dus payen wi dar kindeken cleyn
Gheboren van eender maghet reyn
Het weent so menigen traen
Het sal ons van sonden dwaen