Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend❧ Dit liedeken gaet op die wise alsoot beghint1.
MAria saert/ van edelder aert
Een roose bouen allen doren.
Du hebtste met macht/ weder om ghebracht
Dat langen tijt was verloren
Doer Adams val/ hebt met ghewalt
Sinte Gabriel voersproken
Helpt dat niet en wert gewroken
Mijnre sonden schult/ nu wert mijn hulp
Want gheen troost en is
| |
[pagina 283]
| |
Daer du Maria niet en bist
Bermherticheijt te verweruen
Inden lesten int/ v van mi niet en vint
Als ic sal moeten steruen
2.
Maria milt/ du hebst gestelt
Die alde vaders wten verlangen
Die iaer en dach/ in wee in clach
Die voerhel hielt gheuangen
In alder tijt/ sidy ghebenedijt
Daer doer des hemels poorten
Te samen sijn ontsloten
Een heer af quam/ die hem benam
Pinen sware/ doer een ionckfrouwelijck baren
3.
Maria reyn/ du bist alleyn
Der sondaren troost op eerden
Daer om v heeft/ de eewige wijsheet
Een moeder laten werden
Den hoochsten heyl/ die int grote oerdeyl
Ten ioncsten dage sal richten
Hout mi in dijnre verlichten
O weerde vrucht/ alle mijn toevlucht
Heb ick sondaer/ aent cruyce bistu maer
Met sinte Ioannes ghegheuen
Op dat du mijn/ lief moeder wilste sijn
Bescermt mi in dit leuen.
4.
Maria claer/ du biste voerwaer
In groter smerte beuanghen
Als dine vrucht/ in eere ende in ducht
So scandelijc wert gheuangen
Doer sinen doot/ verwerft mi roose root
Te beteren hier mijn leuen
Terstont ben ick ghegeuen
Met sulcke pijn/ ende alder alleyn
Sonden scult/ ben ic v ghedult
Aen lijf ende ooc aen eynde
O rose root/ dese crancheyt groot
Wilt corts nu van mi weynden.
5.
Maria saert/ gemeerdert wert
In di groot liden en smerte
Als v kint doot/ een spere groot ||
Doerstac sijn saechte herte.
Sijn bloeden sacht/ dat crancte dijn cracht
Mistroost dat dede v sincken
Men sach Ioannes wincken.
Gheras hi liep/ ende v op hief
Doen dat sweert/ dijn siel doer sneet
Daer Symeons woerden af ghewagen
O vrouwe waert/ hy leyt int aert
Des leuens heere beclaghet.
6.
Maria weert/ als mijn arm siele keert
Van deser werelt moet sceyden
So coemt tot mi/ ende bescermt ghi
Op dat mi niet en verleyde
Die valsce tyran/ als ic niet en can
Sijn duuels list bekinnen
O Maria doet mi v minnen
Werpt om mi coen/ dijns mantels zoem
Wanneer dijn kint/ rechten wilt
So toont v ioncfroulike borsten
Dinen soon Iesu/ spreect/ gheeft my nu
Den sondaer die eewige ruste.
|
|