Een devoot ende profitelyck boecxken

❧ Hier nae volgen veel leysenen/ ende sommighe gheestelicke liedekens/ daer men die noten niet af en heeft connen gheuinden/ de welcke nochtans een yeghelijc lichtelic vinden mach/ die de weerlike liekens can daer si op gaen/ die welcke voer elcke leysene gheteekent staen.

N^o. CCXLIV.

ℂ Dit liedeken gaet op die wise van Vriendelijcker aert.

1.
GHetrouwer lief en vant ic niet
Als ick mi bedencke in minen sin ||
Hoe vriendelic dat hi mi aensiet
In hem is verborgen gestadige min.

[p. 282]

 

⁺

 

Mijn minne viel hem so swaer

 

Wel drie en dertich iaer

 

hi had mi lief ende ic en achtes niet

 

Dies moet ic truerich wesen

 

Want hi voer mi ten stride ghinc

 

daer hi so menige wonde ontsinc

 

Waer doer wi sijn ghenesen

 

2.

 

Hi heeft verwonnen des vyants macht

 

Ghestadighe minne heeft hem daer toe bracht.

 

Want sijn cracht wt liefden was

 

Dat can ick wel bekinnen

 

Hi was eens conincx soon

 

Ende seer van formen schoon

 

Sijn mogentheyt/ sijn edelheyt

 

Die en can ic niet versinnen

 

Mijn ongestadicheyt is mi seer leet

 

Want ick mi sijns onweerdich weet

 

Als ick mijn cleynheyt kinne

 

3.

 

Hi wort ghedient met grooter macht

 

Die helsche schare ontsiet sijn cracht.

 

Doer hem verblijt tot alder tijt

 

Och alle sijn huysghesinne

 

Haer weelden sijn so groot

 

Dat si altoos oueruloot

 

Druc en liden en is daer niet

 

Tis seer verre van daer verdreuen

 

Men iubileert daer tot alder tijt

 

Der engelen sanc daer seer verblijt

 

Sijn ouer schoon godlijc wesen.

 

4.

 

Sijn vrolijck wesen dat is seer soet

 

Dat my na hem verlangen doet

 

Hi heeft mi dick/ voer gheleyt den strick

 

Nu heeft hi mi gheuangen

 

Seer vast in sijn behoet

 

Dat ick hem beminnen moet

 

Waer ick mi keer/ nochtans hi meer

 

Dat wondert mi als ict versinne

 

Aldat ick hebbe coemt mi van hem

 

Want ic seer cleyn van hauen ben

 

Hoe mocht ick hooger minnen

 

5.

 

Gelijc die leeraer doet verstaen

 

Alle machte des werelts is onderdaen

 

Hi heeft regiment int firmament

 

Haren loop doet hi regeren

 

Hi gheeft der aerden cracht

 

Dat si ons versaden mach

 

Met haerder vrucht/ sijn groote duecht

 

Die vloeyt tot allen eynden

 

Vroet ysser die snelle doot

 

Sijn rijc en heeft gheen eynde ||

+ Fo. C.xxvi.^v-Fo. C.xxvij.^r