Een devoot ende profitelyck boecxken

N^o. CCXLVIII.

❧ Dese leysen gaet op die wise van Verdelo ta faict grande follie/ ghestelt bi Quot/ ter eeren Marie.

1.
COmt al dat leeft/ ende reden gheeft
Loeft Gods sone van hemelrijcke
Ende haer die hem ghedragen heeft
Hier binnen den aertschen wijcke
En slaet ons nu gheen swijcke
Om haer te louen wi menscen cranc
Doer haer alder hoochste ontfanc
Los/ vry van allen versijcke ||
2.
Noyt soeter boetschap was ghehoort
Dan van den enghel Gabriel
Die welcke die dat goddelijck woort
Mariam brochte/ ende niemant el
Tbetaemde haer wter maten wel
Dat si antwoerde de suuer greyne
Ende sprac/ siet hier Gods deerne cleyne
Mi moet gheschien nae Gods beuel.
3.
Het hoochste mysterie was daer present
Vereenicht met godlic accoort
So dat by haer volmaect consent
In vleesch verandert is het goddelijck woert.
Het was ons menschen een groot confoort
Dat ghi Maria reyn maechdelijck oert
Voer alle beghin vercoren waert
Om god ende mensch te brengen voort
4.
Hoe wel staet ons te gheloouen dan
Sonder twifel ost ghekijf
Dat God in Maria wert sonder man
Als in Adam dat eerste lijf
Wert van hem sonder vrou een wijf
Dus ontfinck Maria/ die suyuer puere
Den scepper in haer bouen nature
Dwelc was voer ons een salich beclijf
5.
Het godlijc secreet heeft dit voersien
Dies si so wonderlijck heeft ghewrocht
Het moeste bi eender maecht gheschien
Dat wi tot gracien sijn gherocht
Des vyants bant is nu ontknocht.
Want wter hoochster Gods mogentheyt
Quam God aennemen onse menschelicheyt
In v/ die noyt quaet en docht
6.
Dus bleef Maria met God bevrucht
Alleene doer des enghels woerden soet
Hi seyde Maria sijt sonder ducht.
Ghi hebt ontfangen dat opperste goet
Adams misdaet is nu gheboet.
Ghi sult na neghen maenden termijn

[p. 287]

 

⁺

 

Gods eerweerdighe vercoren moeder sijn

 

Ende dat doer v perfecte ootmoet.

 

7.

 

O weerdige Maria suyuer maecht

 

Hoe was v moederlijc herte verblijt

 

Doen ghi uwen eyghen sone saecht

 

Gheboren/ dat enghelijc iolijt

 

Die herderkens songen ter seluer tijt ||

 

Ons is gheboren een vruchte vol weerden

 

Die ons pays brengt hier opter eerden

 

Dat is ons menschen groot iolijt

 

8.

 

Als seuen dagen waren leden

 

Van sijn geboerte den .viij. dach

 

So was dat kindeken besneden

 

So ons scrifture doet gewach.

 

Vijf dagen daer in datmen sach

 

Gheleet bi eender sterren claer

 

Iaspar/ Melchior/ Balthasaer/

 

Homagie hem doende dyet vermach

 

9.

 

Princesselike moeder/ende maghet playsant

 

Het was v om hooren een bitter leet

 

Doen ghi in dat egipten lant

 

Moeste vlien doer Herodes wreet

 

Dies tsweert vau rouwe v siele doersneet

 

Daer nam die processie een beghin

 

Van Symeon/ maechdelijc swin

 

Om die te liden waert bereet

 

10.

 

Bidt alle Mariam dese moeder goet

 

Ende haerder vrucht ghebenedijt

 

Dat hi ons verleene doer haer ootmoet

 

Pays ende naringhe in onsen tijt

 

So moghen wi worden verblijt

 

Ende in dit leuen troostelijc gaen

 

Wilt ons ter wterste noot bistaen

 

Segt alle Amen die sondaers sijt

+ Fo. C.xxix.^r-Fo. C.xxix.^v