Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendDese leysen gaet opde voys van een ypers mer liedeken Wij hebben gheweest in fantasien.❧ Ian die enghels sonder ghetreur
Was van dese leysene facteur
1.
DAt Adam inden appel beet
Dat mach ons allen wel wesen leet
Want bi dien in pine wreet
Ghebrocht sijn groot en cleene
Eua ghi deet ons cranc bescheet
Eylaes
Dat ghi ons bracht in weene
2.
Tfij ghelooft ghi tserpent seer sel
Dat ghi den woerde Gods waert soe rebel.
Doende Adam sulc een ghequel
Tghebot heeft hi ghebroken
Dijn troost het dede dit opstel
Eylaes
Het wort op ons ghewroken
3.
Die gramscap Gods in toorne swaer
Sloot den hemel vijf. M. iaer
Des laghen lange int misbaer
Die oude vaders in liden
Wachtende een kindeken claer
| |
[pagina 288]
| |
Eylaes ||
Dwelck datse soude verbliden.
4.
Het hoochste mysterie heeft dat versien
Dies daelde denghelijc engien
Ghegroet sijt Maria/ in wien
Veel gratien sijn gheresen
Groot wonder hadt ghi in dien
Eylaes
Ende wert versaecht mids desen
5.
Gabriel sprac sijt onuersaecht
Ghi hebt den vader so behaecht
Hi wil dat ghi gods sone draecht
De heylige geest sal v omgorden
Doert volmaect consent deser suuer maecht
Onbeclaecht
Dwoert is vleesch gheworden
6.
Maria sijnde onbeswaert
In duechden alder meest vermaert
Het duyster der hellen heeft sy verclaert
Sonder wee oft sonder pijn
Heeft si god ende mensch gebaert
Verclaert
Der sielen medicijn.
7.
Van sonden bleef si onbesmet
Ende woonende te Nazareth
Gheboren wter ioetscher wet
Moeder ende maghet vercoren
En ware niet v kindeken net
Eylaes
Wij waren verloren
8.
Nu bidden wi dese maget goet
Die Adams sonde heeft gheboet
So dat haer volmaecte oetmoet
Ons verloste al ghemeyne
Doert storten vant onnosel bloet
Eylaes
Van haer kindeken cleyne.
|
|