Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 271]
| |
No. CCXXXV.aant. 1.
Een kint is ons gheboren in bethleem
Dies hadde Herodes thoren
Dat scheen aen hem.
Als Herodes dat vernam
Dat dat kindeken || gheboren was
Was hi toornich ende gram
Ende hy ontsach hem das
Dat hy verliesen soude sijn rijcke groot
Hy peysde hoe hi mocht brengen dat kindekijn ter doot
2.
Doen Herodes dat vernam
Dat dat kindekijn geboren was
Te bethleem in die cribbe
Als die prophecie las
Doen dede hi al omme senden
Om meesters groot
Ende vraechde hoe hi mocht brengen
Dat kindekijn ter doot
Een kindeken is ons ghebo. &c.
3.
Drie coningen wt orienten
Quamen te Iherusalem
Sij vraechden waer hi gheboren waer
| |
[pagina 272]
| |
Die coninc der ioden
Sij saghen in orienten
Der sterren schijn
Totter tijt toe dat sij vonden
Dat soete kindekijn
Een kindeken is ons ghe. &c.
4.
Herodes sprac totten coningen
Gaet wech/ ende soect dat kint
Met also grooter eeren
Men seyt hi is coninck
Coninck bouen alle coningen
Soe is hi fijn
Men seyt hi sal besitten
Dat rijcke mijn
Een kindeken is ons. &c.
5.
Als ghi dat kint hebt vonden
Keert wederom tot mi
Dat ick in corten stonden
Mach weten waer dat si
Ick soudet so gaerne aenbeden
Dat soete kindekijn
Het heeft so seer doersneden
Dat herte mijn
Een kindeken is ons. &c. ||
6.
Doen die coningen quamen
Buyten Ierusalem
Met vruechden dat sij saghen
Die sterre staen voer hen
Ter tijt toe dat sij vonden
Dat soete kindekijn
In doeckelkijns ghewonden
Al bider moeder sijn
Een kindeken is ons gheb. &c.
7.
Doen si dat kindeken vonden
So wast derthien daghen out
Si offerden hem te dien stonden
Myrre/ wieroock/ ende gout.
Dat deden sij daer omme
Daer was grooten noot
Sij vonden tkint ende die moeder
Van hauen bloot
Een kindeken is ons ghe. &c.
8.
Snachs doe si slapen wouden
Quam die engel Gods tot hem
Dat sij niet keeren en souden
Al doer Iherusalem
In eenen anderen weghe
So sijn sij ghekeert
Den wech tot haren lande
Alsmen ons leert.
Een kindek
9.
Nu bidden wij desen kinde
Dat Iesus is ghenaemt
Dat hi ons wil bringhen
Daer bouen int soete lant.
Al daer die enghelen singhen
In alder tijt
Dat gonne ons God die heere
Der heeren ghebenedijt.
Een kindeken is ons ghe. &c.
|