Een devoot ende profitelyck boecxken

[p. 265]

⁺

+ Fo. C.xix.(bis)^r-Fo. C.xix.(bis)^v

N^o. CCXXX.aant.

1.
❧ Fonteyne moeder/ maghet reyne
Bloeme der ghenade || aen greyne
Laet ons di louen tot alder tijt
2.
Een vruchte heeft God aen v vercoren
Weerdiger vrucht en was nye gheboren
Noch saligher op aertrijck
3.
Recht yst bouen der natuere
Een kint bracht voort die maghet puere
Een trooster alder werlt wijt.
4.
Feeste seer groot is wel bequame
Nu dese tijt/ al om den name
Iesus kerst ghebenedijt.
5.
Tot groten druck waren wi al
Ghecomen bi Adams ongheual
Int voerburch vander hellen crijt
6.
In swaren verdriet moesten daer beyden
Die oude vaders sonder scheyden
Also ons die scrifture belijt
7.
Seer vrolijck werden si als si wisten
Troost te ontfane van Iesum Christum.
Doen maecten si groot iolijt
8.
Hier om so sullen wij dencken
Ende hert ende sin den kinde schencken
Soe vlien wij wel des vyants strijt
9.
Nu laet ons oock die suyuer bloeme
Louen ende dancken sonder roeme
Want daer af coemt ons seer groot profijt