Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 258]
| |
No. CCXXVI.aant. 1.
ℂ Laet ons met herten reyne
Louen dat kindeken cleyne
Het brengt ons wten weyne.
Ons is een kint gheboren
Een sone ghepresenteert
Hy wil die helle gaen storen
Als mensche ghefigureert
Hi wil ons alle ghemeyne
Verlossen wter pine
Met sinen bloede alleyne.
2.
Nu mogen wij wel dancken
Der maghet die hem droech
In hare suyuer lancken ||
Die vrucht haer niet en verwoech
Weest: vrolijc groot ende cleyne
Om dat soete kindekijn
Het behoet ons voer alle weyne
Laet ons met herten. &cet.
3.
Die vader van hier bouen
Sprack sinen enghel an
Ick wil die helle gaen verstouen
Verlossen wijf ende man
Gaet totter schoonder fonteyne
Maria claer aenschijn
Ende segt haer wat ick meyne
Laet ons met herten reyne. &ce.
4.
Groetse mi vriendelike
Die schone suyuer iuecht
| |
[pagina 259]
| |
Ende segt haer blidelike
Si mach wel sijn verhuecht.
Want si/ ende anders gheene
Gods moeder moet si sijn
Ic ben met haer ghemeene
Laet ons met herten. &cet.
5.
Al binnen Nazarette
Quam denghel Gabriel
Ende sprack totter fiolette
Met soeten woerden snel.
God groet v maghet reyne
Vol gracien is v aenschijn.
God is met v alleyne
Laet ons met her. &ce.
6.
By v sal noch becliuen
Dat Adam heeft ontvrijt
Want bouen alle wiuen
Sidy ghebenedijt.
Ghi sult ontfaen een greyne
In uwer herten scrijn
Des vaders soon alleyne.
Laet ons met herten. &c.
7.
Sy sprac ootmoedelijcke
Hoe soude dat comen bi
Ick en kende sekerlijcke
Noyt man/ het wondert mi
Dat ick/ ende anders gheene
Gods moeder soude sijn
Mijn hert wort cout als steene
Laet ons met herten. &c.
8.
Die enghel sprack tot hare
O weerde suyuer maecht
En weest in gheenen vare
This wonder dat ghi claecht
Want ghi sult sonder pine
Baren een kindeken cleyne
Ende bliuen maghet reyne
Laet ons met herten. &c.
9.
Die heylige gheest sal comen
In v wel soete wijf
Ontfaet voer onse vrome
In v als smenschen lijf.
Hi wil ons alle ghemeyne
Verlossen wter pine
Met sinen bloede alleyne. ||
Laet ons met herten rey. &c.
10.
Die maget haer conforteerde
In dat haer die enghel seyt
Ende si respondeerde.
Ick ben nu oock bereyt
In uwen woerden alleyne
Set ick den wille mijn
Siet hier Gods deerne cleyne.
Laet ons met herten. &c.
11.
Die enghel schiet van hare
Die maghet bleef bevrucht
Al sonder pijn oft vare
Oft sonder herten sucht
Baerde die suyuer reyne
Die hemelsche doctrine
Des vaders soon ghemeyne
Laet ons met herten. &c.
12.
Gheloeft so moet si wesen
Nu ende in alder tijt
Bi haer sijn wij ghenesen
Si bracht ons groot iolijt
O weerde maghet reyne
Des sondaers medicine
Bidt voer ons allen ghemeyne
Laet ons met herten reyne
Louen dat kindeken cleyne
Het brengt ons wten weyne
|