Een devoot ende profitelyck boecxken

[p. 251]

⁺

+ Fo. C.xij.(bis)^v-Fo. C.xiij.(bis)^r

N^o. CCXXI.aant.

ℂ Op die selue wise.

1.
HAd ick vloghelen als een arent grijs
Ick soude so hooghe vlieghen
Daer bouen in dat schoon paradijs
Tot minen soeten lieue
2.
Dan soude ic segghen vader mijn
Wanneer suldy mi halen
Wt dese allende op aertrijck
In uwer hoochster salen.
3.
Waer is die dochter van syon
Ick wilse vrolijck maken
Ic wil haer een boetscap doen
Van also hooghen saken
4.
Die hoochste inder minnen
Dat is Iesus Marien soon
God laet ons hem ghewinnen
Daer bouen inden throon
5.
Dat hemelrijc ende aertrijck
Noyt man en conde ghebruyken
Dat sal een suyuer maget reyn
In haren lichaem besluyten.
6.
Die duysternisse is ons verclaert
Dat licht is op gheresen
Een maghet heeft een kint ghebaert
Dat mach wel wonder wesen.
7.
Dat kint was teeder ende cranc
Een maghet moestet voeden
Tis recht dat wi hem weten danc ||
Van sijnder groter armoeden.
8.
Heer Iesu crist wat hebt ghi ghemeent
Wij soudent v gaerne vragen
Dat ghi hier dus ligt en weent
Ghi sijt so ionck van daghen.
9.
Dat dus viel ende was ongereet
Dat moghen wi nu ghebruyken
Dat Adam inden appel beet
Dat dede den hemel sluyten
10.
O moeder Gods van hemelrijc
Coninginne in shemels throne
Bidt voer ons allen innichlijc
Uwen alder liefsten sone
11.
Dat wij daer bouen moeten
Daer die engelen vrolijc singen
V ende v lief kint groeten
Dat wil ons God ghehinghen