Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 252]
| |
ℂ Een ander leysene. 1.
Nu laet ons allen Gode louen
Den oppersten coninc van hier bouen
Dies niet en doet hy is verschouen/quotidie
Hy is van eender maghet gheboren Rex glorie.
2.
Van bouen quam hi hier te voren
Om van eender maghet te wesen gheboren
Waer hy niet ghecomen wi waren verloren
Quotidie Hi is van. &c.
3.
Dit edel kint is ons gheboren
Van eender maget dyet hadde vercoren
Mids desen soe bleef die duyuel verloren
Sine fine Hi is van. &c.
4.
Int huys al daer dat kint in lach
Daer wast seer cout nacht ende dach
Daer om so weendet ende riep o wach
Pre frigore. Hi is van eender
5.
In die cribbe was hi gheleyt ||
Een God inder drieuuldicheyt
Die osse ende ezel aenbadent ghereyt
Vt scio vere Hi is van.
6.
Wt orienten al sonder saghen
So quamen binnen. xiiij. dagen
Drie coningen die tkint verbaren sagen
Summo mane Hi is.
7.
Als si gegangen hadden verre
Doen sagen si waer een sterre
Hen wijsde den wech dair Ihesus in lach
Cum sua matre Hi is. &c.
8.
Als sij dat kint metten oogen aensaghen
So waren sij blide/ hoort wat sij daden
Sij offerden hem myrrhe ende daer toe gout
Et cum thure Hi is van. &c.
9.
Si namen oerlof om wederkeeren
| |
[pagina 253]
| |
Si ghingen thuys met groter eeren
Eenen anderen wech moesten sij keeren
Ab Herode. Hi is van. &c.
10.
Van Bethleem was dat kint gheulucht
In Egipten/ want men hadde ducht
Dat Herodes soude dooden die vrucht.
Dies sijt ghewis Hi is van
11.
Dat Adam inden appel beet
Dat mocht ons alle wesen leet
Mids desen so dreef ons die duuel int leet
Ac dolore Hi is van eender ma. &ce.
12.
Van deser pinen loste ons dat kint
Dat en willen wij weten niet een twint.
Daerom sterf hi die edel coninc
Amara morte Hi is van. &c.
13.
Die valsche verrader Iudas
Vercochte sinen meester opten woonsdach
Daer omme seg ick dat hi dwaes was.
Certissime Hi is van eender
14.
Iudas die verrader fel
Gaf den ioden een teeken wel
Dyen ick cusse ende nyemant el
Hunc tenete. Hi is van. &c.
15.
Te metten tijt was hy gheuaen
Sijn iongers sijn hem al af ghegaen
Voer Pylatus was hy ghedaen
Hora prima Hi is van. &cet
16.
Op sijn schoudere moeste hy draghen
Een cruyce van so swaren waghen
Te Caluarien gaf hi sijn claghen
Cum dolore Hi is van. &cet
17.
Ter sester vren ghinghen sij hem hangen
Tusscen twe dieuen met grooter scanden.
Sij gauen hem drincken azijn || ghemengt
Cum felle. Hi is van eender maghet. &c.
18.
Te noene stac hem in sijn side
Longinus/ dies was hi soe blide
Wanthi wert siende te dyen tide
Hoc scio vere hi is van. &c.
19.
Te vesper tijde nae minen waen
Was hi van den cruyce ghedaen
Te compleeten groeuen sij hem saen
Cum corpore hy is van. &c.
20.
Nu laet ons alle vriendelijck
Bidden Iesum van hemelrijck
Dat hi ons allen deyle sijn rijc
Sine fine
Hi is van eender maget gheboren
Rex glorie.
|