Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
DIe vader God van hemelrijc
Heeft die werelt so seer bemint
Dat hi den sone die eewich is
Ende met hem regneert/ hier beneden heeft ghesint.
2.
De sone Gods is hier neder ghecomen
Van minnen gheworden een kindekijn
Die menscheyt heeft hi aen ghenomen
Gheboren van eender maghet sijn.
3.
In armoeden ende in allinden
Is gheboren een cleyn kint
In doecken moestment winden
Bont noch grau en was daer twint. ||
4.
Honger/ dorst/ martelie groot
Heeft sijn menscheyt so ghequelt
Hi sterf van minnen die bitter doot
Om onsen wil dat weetmen wel.
5.
Die maledictie die ons was bleuen
Van Adam/ dat groot fenijn
Heeft hy met sijnder doot verdreuen
Ghebenedijt so moet hi sijn
6.
In dit kint sijn twee naturen
Die godheyt ende die menscheyt
Ghenadich is hi in allen vren
Wt hem vloeyt alle salicheyt
7.
Nu laet ons louen dat kindekijn
Met niewen sange dats wel ghedaen
Iesus is den name sijn
Hi heeft ons hemelrijc ontdaen.
8.
Sijn weerdige moeder Marie
Heeft hem ghesooghet nu ter tijt
Met haren borsten maget vrye
Dies moet si sijn ghebenedijt
9.
Wij bidden der moeder van desen kinde
Dat si ons helpe ende gheleyde
In ons alder leste ynde
Als wi van hier moeten sceyden
10.
Glorie/ lof/ eere/ weerdicheyt
Si desen kinde tot alder vre
Drieuuldich in persoonlicheyt
Een God/ een wesen/ ende een nature.
|
|