Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Die selue wise1.
WI moeten van dese werelt sceyden
Als onsen tijt hier comen sal
Dus wil hem elc daer toe bereyden
Oft anders coemter af misual
Wij moeten laten dit aertsce dal
Tis al gaet vore/ ic volge v na
Dan moet ghi van v leuen al
Gheuen reden van alle quaet
2.
Ghi iongers wat wildy v verbliden
In deser werelt corte iolijt
Ghi moet dat vale peert beriden
Want seer cort is dinen tijt
Als ghi sult horen der doot ghecrijt
Dan sal v herteken segghen eylaes
Siet dat ghi op v hoede sijt
Te gheuen reden van alle quaet
3.
Ghi dochters van amoreuse sinnen
Peyst dat ghi morgen moet van hier
V sal verdrieten der werelt minne
Oft anders moet ghi int helsche vier ||
Vliet die werelt ende haer hantier
Eer v die doot ter neder slaet
Al is v herte ionck, en sier
Ghi moet reden gheuen van alle quaet.
4.
Wat mach ons grote rijcdom baten
Als wijt hier al laten moeten
Ons eten ons drincken wter maten
Dat brengt ons inder hellen sloot
Al baeydy inder werelt goet
Men salt wel weten noch hier na
Dus van al dat ghi hier misdoet
Moet ghi gheuen reden van alle quaet,
5.
Maria Gods moeder ende maghet reene
Wilt voer ons bidden ter lester noot.
Iesum Christum van nazareene
Die voer ons sterf de bitter doot
Die temptacien sijn also groot
Wilt sijn die ghene die ons beraet
Dat wij sonder eenighen wederstoot
Mogen gheuen reden van alle quaet.
|
|