Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 245]
| |
ℂ Dit is die wise Dit heffe ick op dit wil ick vaten. 1.
Een edel fonteyn is ons ontsloten
Die lange heuet stille ghestaen
Den brant der minnen is wt gheuloten
Daer alle sondaren mogen toegaen.
2.
Die riuieren vloeyen/ die aderen springhen
Die beke leyt so diep int dal
Die ghenade en can engel noch mensche bekinnen
Die daer wt vloeyt ouer al
3.
In dese fonteyne laet ons hopen
Hoe vele dat wij hebben misdaen
Iesus wonden staen altijt open
So wie daer coemt sal ghenade ontfaen.
4.
Wie hier in heeft sijn woonstede ||
Die blijft altoos onuersaecht
Want hy heeft daer ghewarighen vrede
Anders nemmermeer so wat hi iaecht
5.
Want wat wij soecken tot eenighen stonden
Ghewarighen vrede en vinden wij niet
Dan alleen in Iesus wonden
Daer crighen wij troost van alle verdriet.
6.
Och conden wi dit te rechte bekinnen
Hoe alle vruechde hier in steet
So en soude ons gheen dinck mogen verwinnen
Engel/ noch mensche/ noch vyant wreet.
7.
Wij sullent beclaghen noch al soe seere
Als ons die leste vre aen staet
Dat wij in Iesus wonden niet eere
En hebben gheset ons toeuerlaet
8.
Maer nemmermeer en ist te spade
Soe langhe als leuen in ons es
| |
[pagina 246]
| |
Altijt staet open Gods ghenade
Tot elcken sondaer sijt seker des
9.
Wie nu beswaert is met swaren sonden
Ende in corten stonden verlost wil wesen.
Die gae met betrouwe tot Ihesus wonden
Hi sal volcomelijck al ghenesen
10.
Vliet totter fontenen sonder gront
Die den dorstighen laeft altoos
Noyt mensche en is tot eenigher stont
Van daer ghesceyden troosteloos
11.
Maect alle daghe hier v ghelaghe
Weest niet verslaghen om der sonden ghetal
Versaedt uwen lost/ vraecht niet wat cost
Want het is so diere vergouden al
12.
Met siluer noch met rooden goude
En is ons ghecost dese ghenade groot
Diese ons van minnen gheuen woude
Die heeftse betaelt met sijnder doot
13.
Och laet ons hopen met diepen verlangen
Tot deser fonteynen/ waer willen wi bat
Daer ontfangen wij ghenade hoe dick wij vallen
Want si is der armer sondaren schat.
14.
Iesus doot/ sijn bitter liden
Sijn open herte/ sijn wonden root:
Dat watere ende bloet wt sijnder siden
Moet ons staen in staden ter laetster noot. ||
15.
Dit dit liedeken heeft gheset in dichte
Die is beswaert metter sonden last
Die wonden Iesu moeten hem verlichten
Daer op staet sijn betrouwen vast.
|