Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
MAria coninghinne
Mijn troost mijn toeuerlaet
Vercrijcht mi ws kints minne
Ende berou voer mijn misdaet.
2.
Want ic wort wel gheware
Dat Iesus minne is goet.
Want si cant herte verclaren
Ende gheuen goeden moet
3.
So wie yet sal beghinnen
Tot sinen lof ende eere
Staet hi niet inder minnen
Het sal hem verdrieten seere
4.
Dus is mi inden sinne
Dat alle minen dienst is niet
Doe icken sonder minne
Traghelijc/ oft in verdriet
5.
Hier om wilt mijnre ontsermen
Maria edel vrou
Ende wilt mi toch beschermen
Met Iesus minne ende v.
6.
Och had ick mi begheuen
Doen ick out was thien iaer
Totten gheesteliken leuen
Ick waer sijn minne naer.
7.
Nu mach ick wel beclaghen ||
Beweenen tot alder tijt
Dat ick mijn ionghe daghen
Aldus ben worden quijt.
8.
Nu troost mi keyserinne
Maria suyuer maecht
Sterct mi doer v minne
Droefheyt van mi veriaecht
9.
Maria antwoert der sielen.
O mensche merct van binnen
Swijcht stil/ hoort mijn vermaen
Ende scherpet uwe sinnen
Soe moechdy mi verstaen
10.
V claghen ende begheeren
Dat heb ick wel ghehoort
Laet nu die werelt varen.
Ende wilt mi dienen voort
11.
Ick sal v minne verweruen
Van Iesu minen soon
Maer denct lieuer te steruen
Dan teghen hem te doen.
12.
Wanneer ghi v cont gheuen
Daer toe met uwen sin
So wilt in vruechden leuen
Want ghi hebt mijns kints min
13.
Die siele antwoert.
Och wie sal mi verleenen
Alsoe int herte te staen
Oft hoe sal ick verdienen
Soe goeden sin te ontfaen
14.
Maria antwoert
O mensche waer sijn v sinnen
| |
[pagina 239]
| |
Hoe dwaeldy aldus seer
Wilt toch in v bekinnen
Wat voer v heest ghedaen die heer.
15.
Veel meer dan ghi cont wenschen
Heeft hi voer v verdient
Maer ghi sijt traech te eyschen
Ende segghen heer verleent
16.
Ghi en cont niet begheeren
Eest salich/ ten sal v gheschien
Maer trouwen sout v deeren
Ten gheschiet v een oft gheen
17.
Waerom sout ghi dan trueren
Oft v verslaen so seer?
Had v God niet vercoren
Ghi en waert hier nemmermeer
18.
Ghi moecht wel in v herte
Trueren om v misdaet
Mer denct dat mijns kints smerte
Alle liden te bouen gaet
19.
Wee hen die dit vergheten
Ende op haer verdiensten staen/
Ende daer op hen vermeten
In mijns kints rijck te gaen.
20.
Thien duysent iaer beneden
Gheleeft seer stranghelick
Heeft hier bouen luttel reden
Te sijn een ooghenblick
21.
Een dropel van sinen bloede
Is weerdich doch alleen ||
Te nemen wter armoede
Alle die werelt ghemeen
22.
Hier om wilt v verbliden
Ende hem dienen trouwelijck.
Hi sal in corten tiden
V halen in sijn rijck.
23.
Die siele seyt
Lof moet v altoos wefen
O suyuer maghet claer
Helpt mi o maghet ghepresen
Bi v te comen daer
|
|