Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
ICk ligghe in desen dale
Met sonden seer beuaen
Dies lide ick grote quale
Ick en can niet op ghestaen
2.
Dat doet der werelt minne
Die heeft mi al verblint
Hoe blide waer ick van sinne
Hadde ict in tijts versint.
3.
Hoe sal ic mi nu bedwingen
Het dunct mi groote pijn
Natuer en wils niet ghehingen
Si wil al in vruechden sijn
4.
Minen geest is wel ghenegen
Om voer mijn sonden te liden pijn
Maer nature is hier teghen
Si seyt ten sal niet sijn
5.
Dus lide ick grote smerte
Ende also grooten strijt
Van binnen in mijn herte
Helpt mi God ghebenedijt
6.
Waer toe sal ick mi keeren
En weet ick ymmer niet
| |
[pagina 240]
| |
Nature wil mi verheeren
Dies lide ick swaer verdriet
7.
Troost soude ic wel begheren
Van onsen heere soet
Maer dien moet ick ontbeeren
Natuere is diet mi doet
8.
Maer sonder troost van binnen
Te leuen/ is liden groot
Och mocht ic nature verwinnen
Soe en hadde ick gheen noot
9.
Dus moet ick striden seere
Al tegen tvleesch en bloet
Helpt mi ghenadighe heere
Dat ick verwinnen moet.
|
|