Een devoot ende profitelyck boecxken

N^o. CXCVII.aant.

ℂ Op die selue wise.

1.
IC wil met groter haesticheyt
Van deser werelt sceyden
Heer Iesus is mijn liefste lief
Nae hem so wil ick beyden
2.
Hi is van bouen neder comen
Ende hi wilt voer ons striden
Hi sterf voer ons die bitter doot
Hi wildet wt minnen liden
3.
Och lieue heer van hemelrijc
Op v roep ick ghenade.
Helpt mi mijnder sonden quijt
Vergheeft mi mijn misdaden.
4.
O siele dat wil ic gaern doen
Maer ghi moet ymmer liden
Ick leedt wel .xxxiij. iaer
Ende al om smenschen wille
5.
Ic sach den heere van hemelrijc
Al in Ierusalem riden
Die cleederen werden voer hem ghespreyt
Ende oock die groene risen
6.
Als hi weder wt ierusalem ginc
Met alsoe groter smerten.
So volchde hem sijn liefste moeder na
Met so bedructer herten
7.
Gaet thuyswaerts sprac hy moeder mijn
Ende weest dijns drucx ghenesen
Ende kiest Ioannem tot een soon
Hi sal v trooster wesen
8.
Neme ic hem tot eenen soon
Hoe salt mijn herte gheliden?
Soe en sal ic tot gheender tijt
Mi mogen verbliden
9.
Iesus sprac lieue moeder mijn
Het moet ymmer wesen
Den doot die ic hier steruen sal
Daer sal Adam bi ghenesen.
10.
O lieue kint moet ymer sijn
Hoe sal ick dat verdraghen
So mach ic onder den cruce staen.
Ende iammerliken claghen.
11.
Als si was onder den cruyce ghestaen
Si sach haer kint daer hangen
Haer liep so menigen heeten traen
Al ouer haer soete wanghen.
12.
O Iesu lieue heere mijn
Wilt toch mijn siele gheleyden ||
Al doer die weerde moeder dijn
Als si van hier sal sceyden