Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 231]
| |
ℂ Op die selue wise1.
IEsus riep sijn beminde bruyt
Coemt haestelijc sonder beyden
Ende doet mi op ws herten duer
Ick spreke v gherne alleyne
2.
Dat maechdeken had haer lief haest ghehoort
Sy stelde haer haest vander straten
Si dede op haers herten duere
Haren brudegom heeft si in gelaten
3.
Doen si hem in ghelaten had
Hi ghinc haer so minnelijc toe spreken
Segt mi mijn wtuercoren bruyt
Waer om hebdy mi soe dick vergheten
4.
Dat ick v lief vergheten heb
Dat doet mijn coude minne
Ick heb mi seluen veel te lief
Daer om en can ick v niet kinnen
5.
Hebdy v seluen lieuer dan mi
Daer toe en hebdy gheen verwe
En dede mijn godlijc onderstant
Ghi sout moeten bederuen
6.
Ic ghelooue lief heer v woerden sijn waer
Voer v en is gheen dinck verholen
Ick ben v arm verdoelde scaep
En laet mi niet verloren
7.
Lief kint dat en soudick niet gaerne doen
Leeft altijt met raden
Een suuer/ reyn/ ootmoedich herte
En wil ick gheen tijt versmaden.
8.
Lieue heer v woerden hebben mi gheraect
Nochtans soe blijft mijn herte beuanghen
Al heb ick menich goed opset
Ick ben seer haest gheuangen.
9.
Lief kint dat is v eygen scult
Dat doet v quade nature
Wanneer ick v proeue met teghenspoet
Soe wort v herte dickwils droeue
10.
Ic sie wel wat v let lief kint
Ghi gheuet spel al verloren
Als ic v onttrecke mijn soeticheyt
Ende legghe v suer te voren
11.
Lieue heer dat en is geen ongelijck
Ghi legt mi al int suere
Ick ete so node dat garsten broot
Dat crenct mijn arm nature.
12.
Ghi en sijt niet beter dan Dauid en was
Hy en heeft gheen ander broot gheten
Hi weende so menighen heeten traen
Voer alle sijn vore gheleden ghebreken
13.
O heere dat en is gheen on- || ghelijck
Ghi hadt Dauid sijn herteken beuanghen
Met uwer tegenwoerdicheit
Hi en conde v niet ontganghen.
14.
Sijt te vreden mijn wtuercoren bruyt
Kiest mi tot eenen lieue
Ende blijft mi ghetrouwe als Dauid dede
| |
[pagina 232]
| |
Ick en sal v niet verlaten
15.
O heere ic sout so gerne doen
Conde ic v heel verweruen
Al sout mi costen vleesch en bloet
Ick sal mi leeren steruen.
16.
Dit lieken is gedicht ter eeren
Van alle ionghe maechden
God gheue hen gracie in haren strijt
Dat fi moeten volherdich bliuen
|