Een devoot ende profitelyck boecxken

N^o. CXCIV.aant.

ℂ Op die selue wise.

1.
BEreyt v huys ter stont
Niet langhe en moechdy leuen
Al sidy nu ghesont
Schoonheyt sal v begheuen
Al sidy schoon oft rijck
Ten mach v niet langhe dueren
Hi staet seer wanckelijck
Die rust op creatueren.
2.
Alst God den heere belieft
So moeten wij van hier sceyden
En sidy dan niet bereet
Men sal niet na v beyden
Het is hier eenen corten tijt
Onseker is die vre
Hi staet seer wanckelijck
Die rust op creatueren
3.
Leest ende wilt verstaen
Ghi sullet vinden bescreuen
Gheringe sal hier vergaen
Den tijt van onsen leuen
Iolijt in deser tijt
Verkeert gheringe in trueren
Hi staet seer wancke. &c.
4.
Edel/ proper/ schoon/ oft rijck
Hoe moechdy v verbliden
Ghi sult doch sekerlijck
Tot sijnder eerden ghediden.
Dachte ghi dit hier altijt
Het wert soet dat nu is suere
Hi staet seer wancke. &c.
5.
Nu bid ick v reyne maecht
Gods moeder wtuercoren
Dat ghi van my veriaecht
Des vyants quaet becoren
Ende weest mi troostelijck
In mijnder laetster vren.
Hi staet seer wanck. &c.
6.
Dit liedeken is ghemaect
Tot machelen in die stede
Die hinck aent cruyce naect
Verleene ons allen vrede
Hi was noch inden strijt
Ende blide van naturen
Hi staet seer wanckelijck
Die rust op creatueren