Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
OCh ligdy nu en slaept
O leuende Gods sone
Och ligdy nu en slaept
Hier bouen inden throone
Staet op en weest bereet
Ende wilt toch tot mi comen
Thoont ons v goddelicheyt
V godheyt is so schoone.
2.
Wie clopt daer aen die muere
Om mijn ghenadichede
Die doot wert mi so suere.
Eer ick ghemaecte vrede
Den thoren was so groot
Hi dede den hemel sluyten
Leert liden totter doot
Oft ghi moet bliuen buyten.
3.
O Iesu lieue heere
Hoe sal ick bi v gheraken
Dat leuen lust mi so seere
Ick en mach geen liden smaken
Het dunct mi swaren arbeyt
Om troost so ben ick comen
Thoont ons v goddelicheyt
V godheyt is so schone
4.
Ghi waent dat ic ben slapen
En dat ick v niet en kinne
Ghi moet v seluen laten
Ende liden doer die minne
Ick moeste so veel liden
Soude ick den hemel ontsluyten
In liden moet ghi verbliden
Oft ghi moet bliuen buyten
5.
Iesu gheminde heere
Hoe mocht v steruens lusten
Dat cruys woech v so seere
Ende ghi en mocht niet rusten
Om onser salicheyt
Droecht ghi een doernen crone
Thoont ons v godde. &c.
6.
Al stont ghi daer tot morghen
So en moechdy niet versinnen
Oft in v herte verborghen
Hoe dat mi dwanc die minne.
Op dat ghi sout sijn ontlast
Ende hemelrijck ontsluyten
Dus moet ghi liden vast
Oft ghi moet bliuen buyten.
7.
Ick sie den lichten dach
Al doer die wolcken dringhen
Ick sie dat niemant en mach
Den wille Gods volbringhen.
Hi en hebbe verduldicheyt
| |
[pagina 223]
| |
In liden hoe dat come
Toont ons v goddelich. &c. ||
8.
Ghi waent met alder lost
Des werelts tot mi te gheraken
Het heeft my meer ghecost
Hemelrijck te smaken
Druck/ liden/ ende seer
Doet hemelrijck ontsluyten.
Ghi moet noch liden meer
Oft ghi moet bliuen buyten
9.
Die liefste die ick weet
Die woont in hemelrijcke
Om hem ben ick bereet
Te liden blidelijcke
Pine/ druck/ ende leyt
Op dat ick v heb te loone
Thoont ons v goddelicheyt
V godheyt is so schoone.
|
|