Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
OCh mensche waer toe wildy v verlaten
Ghi moet doch steruen dat weet ghi wel
Die doot coemt so haestelijcke
Seer onuersienlijc ende so snel
Oft ic dit altijt had in minen sin
Te bedwingen mijn vlees rebel
Maer lacy ic bliue die ick bin
Idel van herten ende licht van sin
2.
Och wonder gheuet mi/ ende meer dan wonder
Dat wi dus licht van herten sijn
Dat wi niet altijt en ouerdencken
Die bitter doot ende sware pijn
Oft ic dit altijt had in minen sin
Mijn lichaem te gaen crencken
Maer lacy ick bliue die ic bin
Idel van herten ende licht van sin
3.
Wat vruechden oft bliscap mach ons lusten
Als ons aen coemt die bitter doot?
Ende alle vrienden ons begheuen
Ende laten inden grooten noot
Oft ic dit altijt had in minen sin
Mijn vlees soude hem tot duechden gheuen
Maer lacy ic bliue die ick bin
Idel van herten ende licht van sin
4.
Aylacy hoe bitter salt sceyden wesen
Als de siele wten lichaem gaet
| |
[pagina 214]
| |
Ende moet in vreemde landen reysen
Daer si niemant en heeft die haer bestaet
Oft ic dit altijt had in minen sin.
Mijn vlees te lossen van svyants banden
Maer lacy ic bli. &c.
5.
Maer als dat lichaem doot sal ligghen
So yst seer vreeslic om te aensien
Ende wat vrienden dat wi daer hebben
Sij sullen so haestelijc van ons vlien.
Oft ic dit altijt had in minen sin.
Mijn lichaem tot duechden te trecken
Maer lacy ic bliue. &c.
6.
De siele die reden moet gheuen ||
Van al dat dlichaem heeft misdaen
Hoe droeueliken sal si weenen
Als si voert ordeel gods sal staen
Oft ic dit altijt had in minen sin
Ick soude van vreese beuen
Maer lacy ic bliue die ic bin. &c.
7.
Het lichaem dat hem plach te vercieren
Met groter ghenoechten ende wellusticheyt
Dat moet hem nu te vreden stellen.
Met een verworpen linen cleyt
Oft ic dit altijt had in minen sin
Om mijn lichaem te quellen
Maer lacy ick bliue. &c.
8.
O mensche wat salt v mogen helpen
Dat ghi nu sijt soe groot gheeert
Want ghi moet onder die swerte eerde
Dat is dbeste dat ons geschiet
Oft ic dit altijt had in minen sin
Om mijn sinnelicheyt te bekeeren
Maer lacy ick bliue. &c.
9.
Ghi ionge maechden wilt dit bedincken
Wat v int eynde ghebueren sal
Een houten kiste van seuen voeten
Ende het luyden der clocken snel
Ost ic dit altijt had in minen sin
Om den strijt des vlees te versoeten
Maer lacy ick bli. &c.
10.
Sij sijn wijs die dit connen versinnen
Ende latent hen ter herten gaen
Al yst dat wij de werelt beminnen
Het sal hier wesen seer haest ghedaen
Oft ic dit altijt had in minen sin.
Ic soude weenen menigen traen
Maer lacy ick bliue die ic bin
Idel van herten ende licht van sin.
|
|