Een devoot ende profitelyck boecxken

[p. 192]

⁺

+ Fo. xci.^r-Fo. xci.^v

N^o. CLXI.aant.aant.

ℂ Die wise van Claes molenaer

1.
In vruechden is alle die werelt wijt
Die engelen bringen ons groot iolijt
Met vruechden hier beneeden.
2.
Want aen een maget gebenedijt
So is volcomen nu ter tijt
Onser alder salichede
3.
Nature is bouen den loop ghegaen
Een suuer maget heeft ontfaen
Een kint in aertrike
4.
Seer cortelijc yst al voldaen
Dat Esayas dede verstaen ||
Dwelc was seer wonderlike
5.
Dat licht der sonnen is ons gheboren
Die moeder is maghet/ ende bleef te voren
Ende bleef in reynicheden
6.
Inder scrifturen machmen horen
Hoe dat bi Adam was verloren
Tgheslachte der menschelicheden
7.
Kinder nu laet ons blide sijn
Ende louen dat soete kindekijn
Gheboren menschelijcke
8.
Want hi is comen so ic beuroede
Om te verlossen met sinen bloede
Ons allen ghemeenlijcke
9.
Iesus so is die name sijn
Hi weende als een ander kindekijn
Nae sijnder menschelicheden
10.
Twee stomme beesten bekenden wel
Hem/ haren seepper/ ende niemant el Bi sijnder goddelicheden
11.
Een cribbeken stont dair ghemaect
Daer wert hi inne gheleyt al naect.
Die heere van hemelrijcke
12.
Drie coninghen quamen wt verren lande
Ende si brochten daer haer offerhande
Seer blide ende ootmoedelijcke
13.
Nu laet ons bidden dit kindekijn
Met Mariam die suyuer maghet sijn
Dat si onfer willen ontfermen.
14.
Als wi hier niet langher en moghen sijn
Dat si ons dan van die eewighe pijn
Wil hoeden ende beschermen.