Een devoot ende profitelyck boecxken

N^o. CLVII.aant.

ℂ Op die selue wise

1.
ICk wil mi gaen vermeyden
In Ihesus liden groot
Van daer en wil ic niet sceyden
Int leuen noch in die doot.
2.
Tis een prieel met bloemen.
Bedaut met menighen traen
Och mocht ic daer in comen
Mijn trueren waer al ghedaen
3.
Men hoort den nachtegael singen
Al onder den scerpen doren
Sijn herte is vol van minnen
Die wilt die macht horen
4.
Een liedeken heeft hi gheheuen
Al onder den doren groen
O vader willet hen vergheuen
Sij en weten niet wat si doen.
5.
Die schaker badt om vrede
Hi mocht wel hebben prijs
Die nachtegael singt/ noch heden
Suldy sijn int paradijs
6.
O vrouwe siet hier dinen soon
Ioannes die moeder dijn
Ick hebse v beuolen
Wilt haer behoeder sijn.
7.
Hi sanck wel also hooghe
Mijn God waer om laetstu mi
Sijn herte wert hem drooghe
Te drincken begheeret hi.
8.
Men scanc hem daer te drincken
Edic met galle ghemengt.
Sijn hooft dat liet hi sincken
Hi sprac/ veruult is alle dinck.
9.
O vader in uwen handen
Beueel ick minen gheest
Met also soeten sanghe
Voer hi in een ander foreest.
10.
Hi liet die violette
Al onder den cruyce staen
Die hem te Nazarette
So ootmoedelijc hadde ontfaen
11.
Hi liet die open roose
Aent cruyce hangen soe root
Haer bladerkens liet si risen
Die nachtegael bleef van minnen doot.