Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendNo. CXLVII.aant. 1.
Een goet man had een dochterkijn
Die had hi wtuercoren
Si en wilde hem niet gehoorsaem sijn
Des hadde hi groten thoren
2.
Dat was God die vader wijs
Ende smenschen siele seer schoone
| |
[pagina 180]
| |
Die sette hi int paradijs
Die coninck vanden throone
3.
Maer die bose viant quaet
Hadde dit herde noode
Ende gaf der sielen dyen raet
Dat si brack tghebot van Gode.
4.
Als God de heere dat vernam
Dat alsoe was gheuaren
Gheen mensche ten hemel in en quam
Wel in vijfdusent iaren
5.
Die sone gods sprac vader mijn
Ic heb so groot verlanghen
Om die siel mijn lief susterkijn
Die de viant heeft gheuangen
6.
Die vader sprac o sone sijn
Wildy daer na gaen talen
So suldy liden druck ende pijn
In also grooter qualen
7.
O vader ic bin daer toe bereyt
Sprac hi wt rechter minnen
Ic wil gaen liden druc en leyt
Mach icxse weder vinden ||
8.
Tot Nazareth hy eerst binnen quam
Daer woonde een maecht ghepresen
Sijn herberge hi eerst by haer nam
Lof moet haer altijt wesen
9.
Daer na track hi te Bethleem claer
Ende in Egipten mede
Ende sochtse dri en dertich iaer
Ontrent Ierusalem die stede.
10.
Maer hi en vant die siele niet
Dies was hi seer in dooghen
Hi sochtse in so groot verdriet
Met seer weenende ooghen.
11.
Hi was so seer met druck beuaen
Ende dacht wt rechter trouwen
Ic sal opten berch van caluarien gaen
Oft icxse daer mocht aenschouwen
12.
Als hi opten berch quam
En heeft hyse noch niet vonden
Des cruycen boom dat hi op clam
Tot dyen seluen stonden.
13.
Doen riep hi mit stemmen ouerluyt
Oft si hem kennen mochte
Sijn suster ende lieue bruyt
Die hi so droeuich sochte.
14.
O suster riep hi susterkijn
Vercoren mijn vriendinne
hoe mach dit comen hoe mach dit sijn
Dat ic v niet en vinde.
15.
Als hi aldus luyde riep
Soe ouerliken seere
Ontspranc si daer si lach en sliep
Ende sprac broeder/ och heere
16.
Wat so is die wille van dy
Gheminde broeder vercoren
Niemant en mach doch helpen mi
Ick moet bliuen verloren
17.
Doen sprac hi lieue susterkijn
Wilt doch met vruechden leuen
Hemel ende aerde die sijn mijn
Die wil ick voer v gheuen
18.
Och lieue broeder ic segghe di
Ick ben in sulcken doghen
Al gaefdy hemel ende aerde voer mi
Ghi en sout my niet helpen moghen.
19.
O broeder also ben ic beswaert
Men mochtet niet bescriuen
Trect weder tot uwen vader waert
Ick moet verloren bliuen.
20.
Hi sprac suster dat doet mi we
Maer hoort na mijn verclaren
| |
[pagina 181]
| |
Al soude ick voer v steruen me.
Ghi moet doch met mi varen
21.
Och broeder ick ben in sulcker noot
Ende in sulcken liden
Ten si dat ghi voer mi sterft die doot
So en mach ick niet verbliden ||
22.
O suster so wil ict dan bestaen.
Sprac hi met stemmen schoone
O vader het is nu al voldaen
Ontfangt ons inden throone.
23.
Aldus so is die siele verlost
Van Christo onsen heere
Dat heeft hem sijn heylich bloet ghecost
Lof si hem ymmermeere.
|