Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
ALs ic beghin te dencken
Op minen verloren tijt
Mijn sinnen willen mi ontsincken
Want qualijc heb ic mi gequijt
Teghen onsen heere
Midts sonden ende misdaet
This tijt dat ick bekeere
Ende dat ick steruen leere
Eer dat ick come te laet
2.
Seer commerlijc staet mijn leuen
Want cort is hier den tijt
Veel sonden heb ick bedreuen
Ende ic en weet gheen respijt
Maer ic mach wel trueren
Als coemt die bitter doot
Want dan salt al besueren
In also corter vren
Die siel in pine groot
3.
Werwaert dat ick mi keere
Ouer al ben ick begaen
Hier bouen is ons heere
Teghen wien ick heb misdaen
Achter sijn mijn sonden
Ende minen verloren tijt
Beneden der hellen gronden
Die mi tot allen stonden
| |
[pagina 160]
| |
Verslinden wil met nijt.
4.
Als ic dan voort aenmercke
Hoet in die werelt staet
Die lueghenen sij verstercken
Die waerheyt te niete gaet
Rechtuerdicheyt is verdreuen
Die trouwe is bleuen doot
Die minne is versleghen
Dit doet mijn herte beweghen
Ende liden pine groot.
5.
Nu mach ic wel suchten en clagen
Ende weenen tot alder tijt
Ick heb soe langhe gaen iaghen
In deser werelt wijt
Om rechte trou te vinden
Maer het is al om niet
This tijt dat ick mi versinne
Ende keere mijn herte binnen
Eer mi meer drucx gheschiet
6.
Nu wil ick eewich bliuen
Ghelijck die Phenix doet ||
Opten berch van oliuen
Daer Iesus op storte sijn bloet
Een vier sal ick daer maken
Van hitten also groot
Al van den dorren staken
Daer Iesus aen woude smaken
Voer ons die bitter doot
7.
Och wilt mi doch beraden
Maria maghet soet
Ende wilt mi staen in staden
Op v draghe ick den moet
In deser dorrer heyden
Daer ick allendich dwale
Ende wilt mijn siele gheleyden
Als ick van hier moet sceyden
Ende brengtse ter hemelseer sale
|
|