Een devoot ende profitelyck boecxken

N^o. CXXVIII.

ℂ Op die selue wise ||

1.
O Lacy ic mach wel claghen
En beweenen minen tijt
Want in mijn ionghe daghen
Dede ick so cleyn profijt
Dies ben ick seer beganghen
Al in dat herte van mi
Die werelt hielt mi gheuangen
Ic en mocht haer niet ontgangen
Ic ben bedroghen daer bi.
2.
Si leyt mi schoon voer oghen
Ick meynde alsoe waer
Daer ben ick bi bedroghen
Ende ghebracht in liden swaer
Der werelt schoon aenscouwen
Hadde mi heel verblint
Ic waende daer op betrouwen
Mer nu macht mi wel rouwen
Dat icxse hebbe ghemint
3.
O werelt valsch betoghen
Wat hebdy mi ghedaen
Ick vint nu al gheloghen
Dat ghi mi deedt verstaen
Met uwen valschen treken
Brocht ghi mi in verdriet
Aldus mach ic wel spreken
Ende claghen mijn ghebreken
Der werelt trou is niet.
4.
Och die bedencken conde
Der werelt valsch bedroch
Hy soude in corten stonden
Sijn herte keeren daer of
En dienen blidelijcken
God ende die moeder sijn
Die en sullen ons niet beswijcken
Maer brenghen in dat rijcke
Daer gheen bedroch en sal sijn.

[p. 159]

 

⁺

 

5.

 

Die gonste is al verloren

 

Diemen der werelt toocht

 

Al hadment mi ghesworen

 

So en hadde ict niet ghelooft

 

Maer nu heb ict beuonden

 

Al cest tot mijnder scade

 

Dies ick in minen gront

 

Druck lide tot alder stont

 

Het was bina te spade

 

6.

 

Och edel creatuere

 

Hoe sidy soe verblint

 

Ghemaect na Gods figure

 

Dat ghi die werelt mint

 

Haer vruecht en mach niet dueren

 

Si en sal niet langhe staen

 

Dit siet ghi tallen vren

 

Si loont met eewich trueren

 

Dat niet en sal vergaen.

 

7.

 

Dus was ic voertijts mede -

 

Verdwaelt als ghi nu sijt

 

Doer Gods ghenadichede

 

Lof si hem tot alder tijt.

 

Dacht ick in minen sinne

 

Het moet nu eens nemen sijn ||

 

Wat ick ter werelt minne

 

Oft wat vruechden ic ghewinne.

 

Het moet ghestoruen sijn

 

8.

 

Dus wilt v doch bekeeren

 

Beminde vrienden mijn

 

Ende wilt doch hier aen leeren

 

Der werelt valschen schijn

 

Bidt Gode ghenade met trouwen

 

Hi is ghenadelijck

 

Ende onser lieuer vrouwen

 

So moechdy hier na bescouwen

 

Die bliscap van dat eewich rijck

+ Fo. lxxv.^v-Fo. lxxvi.^r