Een devoot ende profitelyck boecxken

N^o. CXXVII.

ℂ Op die selee wise

1.
SAnck/ lof/ ende alle spelen
Die sijn altoos ghehoort
Van luyten ende velen
Dat is der werelt confoort
Mer waer in is gheleghen
Der sielen eenich profijt
Dat wort al ghesweghen
Dwelck men soude weghen
Die lijdt die wint den strijt.
2.
Coemt ionger ende wilt leeren
Wat ick v singhen sal
Ende wilt v duecht vermeeren
Hoedt v te samen al. ||
Want ghi noch vre noch stede
En weet/ noch eenighen tijt
Doedijt so hebdy vrede
En dat eewige leuen mede
Die lijdt die wint den strijt
3.
Reyn/ suuer met allen sinnen
So suldy altoos sijn
Ende Iesum altijt minnen
Dat is die leere mijn
So moechdy v verbliden
Hier na in groot iolijt
Tot eeweliken tiden
Leert liden ende striden
Die lijdt die wint den strijt.
4.
In deser werelt pleyne
Besietse herde wel
En yst niet al ghemeyne
Bliscap/ iolijt/ en spel.
Want als si coemt alleyne
Die doot sonder respijt
Si en spaert dan groot oft cleyne
Daer om so hout v reyne
Die lijdt die wint den strijt.
5.
Aerde sidy/ wildijt weten
Hoe moechdy blide ghesijn
Ghi sult saen sijn verbeten
Hier om v seluen stelt
Sijt milde/ deylt den armen
So en hebdy gheen verwijt
God sal uwer ontfermen
Ende van die helle beschermen
Die lijdt die wint den strijt
6.
Bekeert v edel mensche

[p. 158]

 

⁺

 

Ende wilt na duechden staen

 

Al hebdy uwen wensche

 

Het moet doch al vergaen

 

Hier om so moet ghi peysen

 

Al hebdy v iolijt

 

Als ghi van hier sult reysen

 

So suldy moeten deysen

 

Die lijdt die wint den strijt

 

7.

 

Als ghi hebt druc oft liden

 

Denct/ het moet gheleden sijn

 

Wilt doch hier om striden

 

Het moet ghestreden sijn

 

So moechdy hier na wesen

 

Met God altoos verblijt

 

Soe wort ghi ghepresen

 

Van God/ alsoe wij lesen

 

Die lijdt die wint den strijt

 

8.

 

Ionc ende out ghi moet steruen

 

Hoe moechdy blide ghesijn

 

Wilt hier ghenoechte deruen

 

Ende peyst om die eewighe pijn

 

Ende wilt die werelt laten

 

Die wile dat ghi hebt den tijt

 

Wilt v te steruen saten

 

Het sal v seker baten

 

Die lijdt die wint den strijt

+ Fo. lxxv.^r-Fo. lxxv.^v