Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 140]
| |
ℂ Dit is die wise van Tandernaken al opten rijn Daer sach ick twee maechden spelen gaen. 1.
Och voer de doot en is troost en is troost noch
boet
Met rechte mach ick mach ick wel kermen
Mer want ic ymmer ick ymmer steruen moet
Rijc || God wilt mijnre wilt mijnre ontfermen
Al toeft die doot een iaer een iaer oft yet
Het moet eens sijn het moet eens sijn ten baet mi niet
| |
[pagina 141]
| |
Ic moet daer toe alst God alst God ghebiet
Al mach hi mi weynich borghen borghen
Daer om so lijdt mijn herte mijn herte verdriet
Altijt leue ic leue ic in sorghen
2.
Al heeft mi God nu gespaert
Mijn herte verscrict van vreesen
Als ick denck op die henenvaert
Die ymmer eens moet wesen
de doot is snel/ seer fel en wreet
Ick moet daer aen tsi lief oft leet
Mijn teerghelt is een linen cleet
Ick salt hier haest begheuen
Och want ic nu dat seker weet
So mach ick oock wel beuen.
3.
O steruen moet ic dat is vast
Daer om mach ic wel trueren
Die doot heefter soe vele verrast
Ick wachtse tot allen vren
Si spoert mi na gelijc een hase
Wat baet ghenoechte/ wat ba- || tet solaes
Ick moet doch sijn der wormen aes.
Ter stont na na dit versceyden
Dat moet ic olacy arm dwaes
Bedroeft altijt bescreyden
4.
Och als ic ben gheset een lijck
Ende stae ghekist in baren
Ende tvleesch moet rotten onder tslijck
Waer sal mijn siele dan varen
Ic worde te graue met sanghe gheleyt
Die grauers staen daer al bereyt
Niet meer en worde ick nae bescreyt
Om tgoet soe gaet men kinen
Maer och ick weet so crancken bescheyt
Waer dan mijn siele sal bliuen
5.
Lijf/ herte/ nature/ twort al ontstelt
Mijn sinnen bestaen te crencken
Mijn hayr dat crimpt/ mijn bloet dat smelt
Als ick gae ouerdencken
Bedruct/ bevreest/ met grooten gheclach
Och waer mijn siel den eersten nacht
Na mine doot sal worden ghebracht
Oft watmen haer sal tiden
Iolijt/ genoechte/ noch gheen solaes
En can mi dan verbliden
6.
Nu bid ic v prince/ o here god
Wilt mijns ghenadich wesen
Alst vleesch te samen leyt en rot.
Begrauen inder eerden
O schone Maria ic roepe op v.
Och Anna biddet voer mi nu
Dat Ihesus mijnder sielen si getrou
Als ick sal moeten steruen
Dat ick hier nae mach doer v
Dat hemelrijck verweruen.
|